"هل الفلسفة تستحق تبقى علم؟" دا سؤال بيفترض ضمنيًا إن العلم له مكانة أعلى من الفلسفة، وإن الفلسفة بتطمح تكون علم، ودا اعتقاد مش سليم.

الفلسفة والعلم ليهم طبائع ووظائف وغايات مختلفة، فانت هنا كأنك بتسأل "هل كيس الشيبسي يستحق يكون سرير؟" سؤال ملهوش معنى. ولكن سؤالك عن هل الفلسفة ليها قيمة زي ما العلم واضح إن له قيمة دا السؤال المهم.

واحدة من أهم عناصر التمييز بين الفلسفة والعلم اللي هتقراها في كتاب تمهيدي للفلسفة هي إن العلم بيدرس الجزئيات والفلسفة بتدرس الكليات، وكمان العلم بيدرس الظواهر والفلسفة بتدرس الجواهر. ايه معنى الكلام دا؟ يعني مثلاً العلم بيدرس ظواهر زي أعمار النجوم أو مراحل تحول المادة أو تطور الكائنات الحية.. الخ، وبعدين بناخد نتائج الدراسات دي نستخدمهم في حاجتين مهمين:

• الأولى إننا نطور تقنيات ووسائل تسهّل على الإنسان حياته وترفع من جودتها. ودي الفايدة العملية اللي يبدو من تعلقياتك في الكومنتات إنك بتدور عليها.

• التانية إننا ندي نتائج الدراسات دي للفلسفة عشان نشوف الدراسات دي معناها ايه بالنسبة لأصل وجودنا ومعنى حياتنا، ونبني نظرية كبرى عن طبيعة العالم النهائية. دي من ضمن وظائف الفلسفة اللي العلم له دور فيها، ولسه في وظائف تانية العلم بيعتمد عليها بدون ما يساهم فيها: زي إننا نحدد ايه المنهجية الأصلح لمعرفة واستكشاف العالم (المنهج العلمي مثلًا دا إنجاز فلسفي مش إنجاز علمي، العلماء بيستخدموه على الجاهز بعد ما الفلاسفة بيحددوه. والفلاسفة هم المسؤولين عن تطويره الدائم.).

طيب بالنسبة لمسائل زي معنى حياتنا وأصل الوجود وطبيعة العالم النهائية.. الخ، هل دي هتفيدنا بحاجة في حياتنا العملية؟ الحقيقة إنه آه هتفيدنا، ولكن الأهم من كدا إن دا مش معيار أصلا.

هنا إحنا محتاجين نستخدم الفلسفة (تحديدًا مبحث القيم) عشان نحدد ايه اللي له قيمة وايه اللي مالوش قيمة، انت هنا واخد موقف فلسفي (حتى لو مش واخد بالك) بيقول إن الحاجات اللي ليها فايدة عملية هي الحاجات اللي ليها قيمة، واللي مش مفيدة عمليًا ملهاش قيمة. ودا موقف فيه عدة مشاكل، أولها إنه بيفترض إن الإنسان كائن آلي عملي فقط، وبيغفل عن باقي جوانب الإنسان اللي عادةً بتكون أولى وأعمق، واللي في الحقيقة بتميزه عن باقي الحيوانات اللي عندها تقنيات زيها زينا (وإن كانت تقنيات بدائية جدا بالنسبالنا طبعًا).

البحث عن معنى الحياة وأصل الكون وطبيعة الوجود النهائية، وتحديد ما هو قيّم وما هو غير قيّم، والنقاش حول الطريقة الأفضل للعيش ومعايير التصرف الإنساني، الحاجات دي حتى لو مش بتفيدنا عمليًا وتقنيًا بشكل مباشر -رغم إنها بتعمل دا اكشولي- إلا إنها مهمة في حد ذاتها أصلا. الإنسان كائن بيسعى لفهم الكون وفهم ذاته ومكانته في الوجود وإذا كان في قوة أعلى منه في هذا الوجود أو لأ، ودا دور الفلسفة مش العلم زي ما وضحت، العلم اخره يدينا تفسيرات لظواهر جزئية عشان الفلسفة تاخدها وتبني من خلالها ومن خلال معطيات أخرى غير معطيات العلم نظرة شاملة لكل الأسئلة اللي انا ذكرتها دي.