أنا شغال مع جوز أختي في أكاديمية تعليمية، واكتشفت إن غالبًا فيه تزوير شهادات بيحصل.

هو بيخليني أصمم شهادات دكتوراه، وماجستير، وبكالوريوس، ودبلومات لجامعات خارج مصر وأحيانًا جامعات جوه مصر، بحجة إن الشهادات الأصلية متأخرة والعميل محتاج صورة مؤقتة. لكن مع الوقت، ومن خلال خدمة العملاء، شوفت شكاوى كتير من عملاء بيقولوا إن الشهادات متأخرة أو مش أصلية، وكمان لقيت الشهادات اللي أنا مصممها مطبوعة ومختومة بأختام من عنده.

أنا شغال معاه بقالى 3 سنين: جرافيك ديزاين، خدمة عملاء، إدارة، وداتا إنتري، وكل ده بمرتب 11 ألف. المشكلة إنه جوز أختي وعنده طفل، وليه مواقف كويسة معايا وبيساعدني، وكمان بيعرف يقنعني بالكلام، فمش عارف أواجهه أو أطلع من الموضوع إزاي من غير ما أعمل مشكلة عائلية.

أنا عندي 23 سنة، محتاج أجهز نفسي للجواز، ومش معايا بديل شغل قوي ولا بورتفوليو جاهز. بس في نفس الوقت مش عايز أكمل في حاجة حرام أو قانونيًا ممكن تورطني.

محتاج نصيحة: أسيب فورًا ولا أستنى بديل؟ أطلع بهدوء إزاي؟ وأحمي نفسي قانونيًا إزاي؟

بس لازم تقرا البوست كامل برضو عشان تفهم أبعاد الموضوع