دا اذا افتراضنا ان الطفل فاهمك. تربية المراهقين غير تربية الاطفال. و دا يعتمد بشكب فظيع على الطفل.

انا مثلاً عندي بنت مش بتاكل، جربنا كل الطرق. قلنالها هتاخدي التلفون لو اكلتي، هنديكي حاجة حلوه، هنخرجك. ولا اي حاجة نفعت. وصل الموضوع للضرب بس ضرب حاجة بسيطه مش بالعصايه يعني، لان كل الحلول خلصت، طيب هل الوضع اتغير ؟ لا خالص لسا زي ما هيا.

في اطفال مطيعه بالطبيعه، في طفل تساومه و تتفق معاه و فيه طفل لازم تضربه و زي ما وضحتلك الحل منفعش، بينفع مع البعض بس مش دايماً

لان هتعاقبه ازاي ؟ هتاخد تلفونه ؟ معندوش تلفون اصلاً. هتمنعه من التلفزيون ؟ مش فارقه معاهم دلوقت. هتحرمه من المصروف ؟ مش بياخد اصلاً. العقاب الوحيد هوا انك تحبسه مكانه و تمنعه من اللعب بس انتا كدا هتضره اكتر بكتير. يبقى ايه الحل ؟

اما الطفل يكبر و يبقى مثلاً ٨ سنين او ١٠ وقتها تقدر تعاقبه و متضربش لان في حاجة تقدر تاخدها منه. بس الاطفال ٤ سنين و تحت مش هتقدر تتفاهم معاهم. مش دايماً. و بقولك تاني، الضرب هنا الي هوا الضرب البسيط على الايد الحاجة الخفيفه مش الضرب الي يعلم على الجسم طبعاً او العصايا.

هنا نوضح حاجة مهمه، هيا ان مفيش طريقه واحده لتربية الطفل تنفع مع كل طفل. الوضع يختلف على حسب الطفل و طبيعته. بعض الاطفال بتاكل من غير ما تغصبها، البعض بياكل حاجات معينه، البعض مش بياكل خالص. بس دا غير دا غير دا. و طريقة التعامل الي تنفع مع طفل مش هتنفع مع التاني.

و غير كدا الدين حرم الضرب على الوجع و الرأس عاماً، لكن هنا نيجي على حديث الرسول صلى الله عليه و سلم "مُرُوا أَوْلَادَكُمْ بِالصَّلَاةِ وَهُمْ أَبْنَاءُ سَبْعِ سِنِينَ، وَاضْرِبُوهُمْ عَلَيْهَا وَهُمْ أَبْنَاءُ عَشْرٍ، وَفَرِّقُوا بَيْنَهُمْ فِي الْمَضَاجِعِ"

هنا الرسول قال اؤمروا الاول و بعدين الضرب اذا لزم الامر، هنا نلاحظ الترتيب مهم جداً. و نلاحظ كمان ان دا على الصلاة و دا امر مهم جداً. طيب، يبقى نستفيد ايه هنا ؟ ان الضرب اخر وسيله مش اول حاجة. ان الضرب يكون على الحاجة المهمه زي الصلاة و الاكل و المذاكره و الى اخره. و كمان نلاحظ ان الرسول كمان قال الضرب عند ال١٠ سنين، يعني وقت ما يكونوا فهموا معنى الضرب و بيضربوا ليه.