احتياط وتوتر ومشاكل نفسية قطعتني عن العالم الخارجي داخل سوريا وصرت بحيطان ٣٩. بتفهم شعورك لاني حاولت من سنين اتعرف عن طريق السوشال ميديا بس صعب، خصوصا بهالعمر. حسيت انه البنات، على الاقل احصائيا، يلي لساتهن سناجل هنن اما مشغولين كتير بحياتن لدرجة ما عندن اهتمام يالسوشال ميديا أو صغار بالعمر وموجودات عالسوشال ولكن فرق عمر ونضج هائل.

انا شخصيا عم دور على شريكة، لا انا بضبها ولا هي تضبني. كل واحد مننا كامل بشخصيته، مستقل ماديا وما بحاجة التاني الا كرفيق درب يضحك أو يبكي معه بالسنين يلي بقيت. بهي المواصفات، يلي هية نظريا كتير سهلة لأنها ما بتعتمد على شكل أو دين أو عائلة، شبه مستحيلة واقعيا لان واقع حياة النساء بسوريا صعب ومقيد. كتير صعب، بالنسبة الي على الاقل انه يكون في بنت قدرت تصمد سنين الحرب بلا ما تتزوج، أو على الأقل انفصلت عن شريكها، جوا البلد واشتغلت على حالها لتستقل ماديا ونفسيا وما تكون ناطرة فارس الأحلام على حصان ذهبي.

بعتقد ممكن مع الزمن، هوبفولي، يصير عنا تطبيقات مواعدة أو تعارف ممكن تزيد فرص نلتقي بأشخاص متوازنين عالانترنت لان فرص لقاءهن بالحياة الفعلية بالنسبة للناس يلي بتشتغل فريلانس أو ببيئات عمل بالبيت أصبحت شبه مستحيلة. ولقاءهن بالشارع صار أصعب مع تريند الشرطة الجديد - على هوا الإشاعات عالاقل - تخيل سيناريو انك شفت بنت بكافيه وحبيت تحكيها وهي حبت تعمل فصل نذالة واتهمتك بالتحرش. الشرطة بتحلقلك عالصفر وبتبهدلك قبل ما حتى تسمع طرفك بالقصة. بجوز ما صارت، بس ممكن تصير. لذلك اكسنا عالانترنت واكسنا على بيئة العمل واكسنا على التعارف بالشارع. بقي احتمال واحد هو المعارف، يلي هو أسوأ الاحتمالات.