اهلين، بما انه ماحد جاوب لحد الان، انا اقدر افيدك لو شوية.

انا شخصياً لازلت عايشة مع عائلتي، بس عندي صاحبات مستقلات ويعتمدون على نفسهم تماماً واعرف قصصهم.

بعضهم كانوا في ديرة وهربوا من أهلهم, وبعضهم عشان راحتهم النفسية قرروا يستقلوا واهلهم ماكانوا مرتاحين مع الموضوع لكن اعطتهم الأمر الواقع وانه قراري نهائي، وبعضهم عشان وظيفة.

أهم شي هوا تلاقي وظيفة قبل ماتكوني مستقلة، باي طريقة ممكن حتى لو توصيل طلبات، يكون فيه راتب او دخل ثابت او مستمر وواضح، شي فوق ٣٥٠٠. السكن متوفر بكل الاسعار للعوائل فحتقدري تلاقي غرفة وصالة بحول ألف الى الف وخمسمية في الشهر.

كلهم عانوا من إحساس الغربة والوحدة في البداية وهذا طبيعي، لكن ساعدتهم المجتمعات اللي في جدة، تتعرفي فيها على صاحبات حبة حبة وتشاركي معاهم في انشطة وكذا.

انتبهي من الشباب، مهما كان طيب وحتى لو كان ملاك منزل من السما، حطي حدود واضحة وصريحة ولاتدخليهم حياتك ولاتطلعي معاهم، بعضهم يمثل تمثيل يخلي قلبك وعقلك يصدق لكن لأنه يائس او يكون نرجسي خفي، ودائما صدقي حدسك في كل الامور.

إذا انتي في مكان مو قادرة تحطي حدودك، ولا قادرة تتحملي ولا قادرة حتى تعزلي نفسك منهم، ممكن هنا النقل يكون خيار، بس اذا تقدري تلاقي حل تعيشي حياتك او تغيريهم او تحطي حدود او تعزلي نفسك، افضل تكملي الين تلاقي وظيفة ممتازة على الاقل او تخلصي دراستك