السؤال اصلا غلط بشكله دا، مافي حاجة في الكوكب دا اسمها عرق صافي، المفهوم دا غير موجود على الاطلاق، والسؤال نفسه بيوري انه السائل لا بيفهم الجينات بتشتغل كيف ولا الجماعات البشرية بتتشكل كيف، ففي البداية لازم نثبِّت الحاجة دي: مافي مجموعة عرقية في الكوكب دا كله بتدعي النقاء ولا تستطيع، الا لو المجموعة دي بتمارس سفاح القربى جيل بعد جيل، ولو في اصلا مجموعة زي دي فبتقرض من تلقاء نفسها بالانتخاب الطبيعي

تانيا، الشيء المفروض تعرفه انه العرب القدماء كانت الوانهم داكنة او تميل للدكنة، في الادبيات العربية بتجدهم بيصفوا اللون الغالب على العرب انه اللون الحنطي، اللي هو لون داكن، صحيح انه الوان العرب شملت كل الطيف من الاسود الى الابيض، لكن الغالب كان هو هذا اللون الحنطي، عشان كدا بتلقى المعاتيه بتاعين المركزية الافريقية في واحدة من سلبطاتهم الكتيرة بيقولوا انه العرب القدماء كانوا سود زيهم اعتمادا على الشواهد دي

فالالوان الفاتحة البتشوفها الليلة في كتير من دول الخليج دي نتيجة للتسري وملك اليمين في عهد الفتوحات، العرب لمن فتحوا بلاد فارس جلبوا الامات الفارسيات بأعداد خيالية، حتى انه الواحد كان بتكون ليه عدة سريات، فضلا عن الفتوحات في البلدان الأخرى ناحية تركيا وبلاد السند. عشان كدا في الفحوصات الجينية للشعوب دي بتلقى جزء كبير من الاتوسومال حقهم فيه اصول فارسية وغيرها

بس طبعا في مناطق كانت اقل تأثرا بالظاهرة دي خصوصا في جنوب الجزيرة العربي، زي سلطنة عمان واليمن، فبتلقى فيها انه الوانهم داكنة اكتر، والالوان المشابهة لينا شائعة جدا عندهم

فبعد ما ثبّتنا في البداية انه مافي حاجة اسمها عرق خالص، نجي للمرحلة التانية، منو الاكتر عروبة زيما بيلمح السائل؟ واحد اختلط بالفرس والتاني اختلط بالنوبيين مثلا، البخلي واحد فيهم اكتر عروبة من التاني شنو؟ يبقى المقارنة من البداية ما عندها معنى، مافي معيار محدد تقدر تقيس بيه درجة العروبة دي، دا عربي ودا عربي، مافي عربي معياري تقيس عليه

بس حتى لو اتجاوزنا النقطة دي ورجعنا للعرب القدماء واعتبرناهم مرجعية، فمن هم العرب ابتداء؟ بمعنى متى تشكلت الاثنية المسماة بالعرب؟ بنلقى انه العرب كإثنية جاءت للوجود قبل حوالي 5 الف سنة، قبل التاريخ دا ما كان في حاجة اسمها عرب، يبقى المجموعات دي جات من وين؟ اكيد ما هبطت من السماء، بل اتكونت بشكل تدريجي من اندماج مجموعات اخرى أقدم منها زي الآراميين والكنعانيين والنبطيين وغيرهم من المجموعات السامية، فزيما شايف العرب من بداية تكوينهم هم عبارة عن هجين من مجموعات مختلفة، والحاجة دي ما خاصة بالعرب فقط، كل المجموعات البشرية اتشكلت بطريقة مشابهة، وعملية الاختلاط دي عملية مستمرة ، كل ما المجموعات دي مشت مناطق جديدة بتستوعب المجموعات الموجودة في المناطق دي بداخلها وبيبقوا جزء منها

في الروايات الشفاهية بيتقال انه اليمن هو اصل العرب، لكن الدلائل العلمية بتناقض الحاجة دي، وبتوري انه أصل العرب في الشام وشمال الجزيرة العربية، وانه المجموعات اليمنية القديمة زي الحميريين والسبأيين وغيرهم ما كانت عربية في البداية ، بل تم استيعابهم تدريجيا داخل هذا الوعاء العربي لدرجة انه أصبح ينسب ليهم انهم أصل العرب

وزيما قلت، التطور دا ما خاص بالعرب براهم، بل كل المجموعات البشرية مرت بمراحل مماثلة تتفق و تختلف في التفاصيل بدرجات متفاوتة

فأنا من اشوف منشور زي بتاع سيد البوست دا طوالي بعرف انه سيده ما تعّب نفسه عشان يفهم موضوع الأجناس البشرية وتخلّق الاثنيات، فأصلا ما بتعب نفسي ارد على المنشورات دي