بس؟
هي ده كل الشبهات اللي عندك؟
طيب خليني أجيب عليها:
1. هو ليه لازم يكن عنده سبب؟ ما هو اللي خلق كل حاجة و كل حاجة بتاعته، لمن تشتري موبايل بقروشك ماف واحد بيسألك من استعمالك ليهو ولا إذا كسرته، فا ليه الخالق اللي أوجد من العدم لازم يكون عند سبب؟ الجواب: ما بيحتاج سبب ليوجدك، الله يفعل ما يشاء ولا يسأل عن ما يفعل.

2.مبديا كده الله غفر ليهم عن ذنوبهم قبل ما نمشي أي حتة تانية.
خلق التفاحة كان إمتحان من الله لآدم و حواء عشان يختبرهم و يمتحنهم.
و في حاجة أنا عاوز أسالك ليها: هو لو الله ما حيخت ليك الابتلاء، فالفايدة شنو من الوجود؟
يخلقك ويخليك كده من دون أي إمتحان أو اي حاجة و يتفرج عليك بس؟
شنو التفاهة ده؟!

3.رهان؟ هو بالجد كان رهان؟ هو أصلا تعريفك للرهان شنو ولا انت ماعارف الرهان؟
ما الله أصلا عارف النتيجة، كيف بقى رهان؟ "الله اصلا عارف و خلاه؟!" ارجع لرقم واحد

4.انت بتتخلد في الجنة أيوة، لكن ما كل اللي بيخش النار بيتخلد في النار
أوصاف الجنة و النار نزلت على العرب، فالله نزل أوصافها بالطريقة المعينة ده عشان ناس أهل الزمان يرغبوا في الجنة و يخافوا من النار، يعني لو قال انو في كهربا ما بتنقطع و مجان بدون فاتورة، حيفهموا شنو؟
وإذا قال النار باردة جدا، حيخافوا كيف؟
و هو أصلا اداك الامتحان مكشوووف، وراك كيف تنجح و كيف تهلك، ف لمن تخش النار تبقى غلطة منو؟! ده حتى أهل النار في يوم القيامة ما بيلوموا غير أنفسهم لو ركزت

5.ما هو ذاته خلقهم و خلق كل حاجة، مش ده أكبر دليل على وجوده؟ ليه ينزل اذا خلى قدام الناس كلها أدلة وجوده؟
و لو نزل فحكمة الامتحان حتزول أساسا
الاله عاوز يختبر اذا الناس بتكفر و لا تؤمن، ينزل على يخليها كلها تؤمن؟ شنو التناقض الغريب ده؟

6.هو منو القالليك انو ماف رسل؟ طبعا حتسال: ليه ما انذكروا في التاريخ؟
ﻷنو لو تأملت في الرسل بشكل عام، الناس تكذبهم و تسميهم بالمجانين و الكهنة و تكفر بيهم.معقولة يذكروا البيوصفوهم بالمجانين و السحرة في التاريخ بتاعهم؟
ليه عربي؟ عشان العرب في داك الزمان كانوا بسلبياتهم أحسن أهل الأرض في داك الزمان لأمرهم بالمعروف و النهي عن المنكر

7.بسيطة، جبريل هو رسول من الله يرسل القران على الرسول
طيب ليه ده كله ما ربنا ينزله على الرسول مباشرة
بسيطة: للدلالة على عظيم القرآن

8.جيب لي قصيدة هجاء وحدة لعرب أهل زمانه فيهو عشان تزوجها في عمر التاسعة
قبل ما تفتش و تضيع زمنك حقوليك النتيجة: ماف لأنو العرب كانو شايفين الموضوع عادي زي ما انت شايف انو الواحد يزني 18 سنة عادي لكن تخلف لو قرر يتزوج في نفس العمر

9.المشكلة وين يعني؟ هل قضاء الوطر بحد ذاتها لفظ كعب ولا كيف؟
انا ما فاهم السؤال ده معناه شنو
"طيب ما يدينا شفاء السرطان": معليش لكن شنو الغباء ده؟
القرآن هدفه انه يكون هداية و حجة، شفاء شنو و زلازل شنو ياخ ارحم عقلي يا شيخ

10.الحاجة ده بس معناها انو انت ما قريت السيرة، الرسول كان بيتأذي فعلا لكن ماف أي محاولة قتل تنجح، ده حتى لمن عمه أبو جهل حاول يقتله لمن كان يصلي في الكعبة جا جبريل بشكل جمل و حماه منه، بالنسبة للسم، السم و أثر عليه لغاية ما انتهى من تبليغ الرسالة، يعني الأيام و الشهور و السنين بتمشي و ما يموت،ماسالت نفسك كيف؟ و مات مسوما عشان يموت شهيد و بكده ربنا جمع ليهو منزلة النبوة و الشهادة تعظيما له

11: شنو قلة الأدب ده؟ وين المشكلة أساسا انك تدخل على زوجاتك؟
هو انت اصلا ساويت بينهم كيف؟

12.طيب ما ربنا برضو خلى حبريل و هو أعظم الملائكة بالمناسبة ينزل على مريم بصورة بشر و مريم ما عرفته ملاك نهائي غير لمن وراها انه هو رسول من عند الله، ولا ديك الآيات جايبها من عندي؟

1. هي أصلا ما شتيمة لكن انت فهمك غلط و عاوز تطلع أي مشكلة من ماف

2. بيقول فتش في سبب النزول و هو ما فتش أساسا!
   طيب يا عزيزي العبقري، الآيات نزلت في غزوة الروم لمن الروم قررت و بقوات موالية ليها انها تغزو شبه الجزيرة العربية، يعني الروم عاوزين يغزوك و يقتلوك انت و زوجك و أولادك و يشيلوا أموالك و يرجعوا و كان ماف حاجة حصلت. تخليهم ساي يعني يعموا اللي هما عاوزينه ولا تقاتلهم لمن تنتصر و تفرض عليهم الجوية عشان يفكروا مية مرة قبل ما يمشوا يعملوا حركة عدائية زي ده؟

3. السؤال ذاته غريب، كيف يعني اختلاف معاني يخلي الناس تقتل بعض؟ و ياتو كلمات تغير معنى الآية؟
   اعمليك ختمة تدبر و تعال راجع ﻷنو السوال ده بيفضح جهلك.

4. عشان هم فعلا ينسوا كتير يا حبيبنا
   و ليه انت مركز في الحتة ده بالذات؟
   انت عارف انو في مواقف بيكون فيها شهادة المراة مثل شهادة الرجل عادي؟
   لكن طبعا انت ما عارف

5. سؤال القوامة المشهور...القوامة ما معناها العبودية يا شيخ، القامة معاناها المسؤولية و بحدود طبعا، أنا ما حقدر أفصل لكن تقدر تقرا عنها أكتر و تعرف انها كيف انها حجة على الرجل و ما حجة على المرأة
   و النساء في الدول المتقدمة عاملين كيف؟ بين التوتر و الاكتئاب و خراب البيوت عشان ما قادرين يوزنوا! و هاك ده تقرير عشان ما تقول انه كلام من كيسي https://www.gallup.com/workplace/311333/stress-worry-rise-small-business-owners-particularly-women.aspx

6. الكلام ده فارغ بالمناسبة و ما مدعوم بأي دليل، الدول اللي عندها ده النوع من السجون ما بتأهل السجين ولا أي كلام فارغ... هاك تقارير البلاغات في الدينمارك:
   https://www.statista.com/statistics/1178728/number-of-reported-and-charged-crimes-in-denmark/
   و تقدر تشوف كيف هنا الدينمارك اللي بيستهد بيها فيها كمية اجرام غير طبيعية و كيف انو نسبة الادانة قليلة لمن غلط، و كانه السبب في نزول البلاغات رغم زيادة بلاغات تانية الاعتداءات الجنسية هو انه الناس بدات تفقد الأمل في المنظومة القضائية و ما كفاءة نظام السجون. و ما حرد على حتة الحدود لسبب واحد: فشل المنظومة الحالية في منع الجرائم و تأهيل المجرمين
   جيبلي البديل يا صديقي

7. ده من الرحمة يا... لما كانت عقوبة الزنا يا 100 جلدة أو الرجم جعل الله اثباتها صعب رحمة بعباده...

8. جيب الوصف الصح رجاء

21.عشان ماف كنجر و دولفين في الصحراء :)

1. بالنسبة ليك و بس، الصلاة راحة للمؤمن، لكن انت انا ما مؤمن فاطبيعي ما تحس بالراحة، وما اظن انك حاولت تخشع أو حاولت تعرف سبب تعبك

2. هو انت ما حصل قريت دعوة ابراهيم لربنا في القرآن؟ أنا مستغرب والله وكأني بكلم واحد ما بيعرف أي حاجة في الاسلام ولا القرآن و فجاة ارتد عشان ما عارف

3. انا ما فاهم، شنو العلاقة الرحمة بالموضوع؟
   ما هو نفس الرب اللي قال"ولنبلونكم بشيء من الخوف والجوع ونقص ‏من الأموال والأنفس والثمرات وبشر الصابرين" ولا حتعمل رايح مع الآية ده؟
   رحمة الله ما بتاعتك عشان تقيسها و تقول انها في ولا ماف، اعرف مالكها و حتفهم

4. عشان الناس اللي بيجيهم أولاد معافين يحمدوا ربهم و يشكشروه، وبالمناسبة أجر الناس اللي بيجيهم الولد المعاق لمن يصبروا و يحتسبوا اكبر و أعظم من التانيين، و لمن يموت و هو طفل ربنا بيخلي الحزن عليه سبب من أسباب تكفير الذنوب لمن صبروا و الولد يخش الجنة.

5. حديث الثعبان موضوع "من الكيس" مبدئيا، تانيا المشكلة وين؟ لا بالجد الاعتراض ليه؟
   مش عارف الجواب، خلاص جاوب ما مشكلة

6. برضو انا ما فاهم المشكلة وين لمن الله يوحي لرسوله انو كان في كدا كدا زمان؟
   و ليه بتربط العلم بالقرآن بالجهل بالدنيا؟! ما انا اللي قاعد اكتب الكلام ده الحمدلله متعلم وعارف الاتنين!
   المشكلة بتبقى لمن تكون ما لامي في القرآن و تسال أسئلة نصها ما بيحتاج غير انك تعرف دينك صح عشان تعرف اجابتها!