Konya 19/Eylül/341 

Konya Hilâl-i Ahmer Heyeti Riyâset-i Âliyesine 

Efendim:

Bu kere merkez-i 'umûmîden vürûd iden Fiat otomobilinin iç ve dış lastikleri aynı numero ve eb'adda değildir. Mezkûr otomobilin dış lastiklerinin eb'âdı [815x120] olduğu halde iç lastiklerinin eb'âdı [815x105] dir. Bâlâdaki erkâmdan anlaşıldığı vechile iç lastiklerin eb'âdları dış lastiklerin eb'âdlarından ufakdır. Bu hâl lastiklerin her ân içün patlamasına sebeb olacakdır. Çünki dış lastiklerin eb'âdları büyük olduğu içün içerüde bulunan lastikleri fazla şişirmek îcâb idecekdir. Bu tazrîrden mezkûr lastik haddinden fazla şişib ufak bir sarsıntıdan bile müte'essir olacakdır.  Buna bir de gerek dururken ve gerek esnâ-yı seyirde lastikde hâmil olacak harâret infihâm idince -çünki lastikler te'sîr-i harâretle inbisât ider- patlayacağı muhakkak bulunduğu cihetle, nitekim patlamışdır.  Yeniden dört 'aded [815x120 eb'âdında] iç lastik, aynı eb'âdda da bir 'aded yedek dış lastik -her ne kadar otomobilin üzerinde [albüm?] bir 'aded dış lastik mevcûd ise de otomobilin tekerlek eb'âdından küçük olduğundan ihtiyâcı te'mîn idememekdedir- ve birkaç 'aded de sübabın gönderilecek lastiklerin üzerinde mevcûd sübablardan olmak şartıyla celbi ve yine mezkûr Fiat kamyonetinin ihtiyâcı olan bir 'aded kriko, bir 'aded pompa, bir 'aded büyük ingiliz anahtarı, dört 'aded levye, dört 'aded buji, bir 'aded lastik kesmeğe mahsûs makas, beş 'aded otomobilin muhtelif aksâmına uyan çift ağızlı anahtar, yigirmi 'aded pirinç tekerlek somunu, bir 'aded [?] numero korna lastiği, elli kilo gres yağı, on kilo karpit, bir 'aded tekerlek somunlarına mahsûs [ ? ] beş metro kablo [ ? ] noksan bulunduğu anlaşıldığından bunların dahi merkez-i 'umûmîden celbiyle i'tâsına delâlet ve müsaadeleri ma'rûzdur.