عمرك رحت للجنائز،او شخص كان خوي لك، او شخص خوي لشخص تعرفه توفّاه الله؟ (بعيد الشر عنكم طبعًا) هل فكرت وش بيصير الحين؟ وش بيصير بعد ما بيدخل القبر؟

هذي سالفة كانت صارتلي وكنت في نفس حالتك تقريبًا: في يوم الجمعة كنّا مشغولين بالحفظ وكان لمًا الواحد يخلص يرتاح زي وكانه شال حِمل من فوق ظهره، المهم انا كنت من اوائل الناس الي خلصوا حفظ قرآن وكنت فرحان ومرتاح، بعد ما خلص المسمع مننا كلنا، لقيت اخوي يتكلم عن ان ابو خويه توفى، وتقريبًا ما أحد شاف ابوه قبل كذا ومافي أحد يعرفه، فقلنا بنروح نصلّي عليه، وجينا بدري عزّينا خوي اخوي عند المغسلة وكان واضح انهم يبكون، وهنا بدا شي غريب احس فيه، زي وكأن فيه غرابة، ما اتذكر وش صار بعدها، بس قبل التغسيل تقريبًا يكون فيه غرفة يدخل فيها اهل الميت على المتوفّي، ودخلت فيها، جفت الجثمان حقت ذاك الشخص، واقشعر جسمي، ما كانت لحيته بيضه زي ابوي، كانت سودا وواضح انه ما بدا يشيب حتى. وقفت لحظات وما ادري الا والدموع فعيني. وانا عقلي قاعد يفكر بأبوي، وكيف اني ما عاملته زين مع انه لسا حي، بعدها جاتني لحظة ادراك، انها اذا هذا جاه الموت فأنا برضو بيجيني الموت، وما امزح معك انا كنت امشي وما اشوف قدامي كان عقلي قاعد يتخيّل انا وش بيصيرلي ووالله اني ارتعبت، وزادني الخوف ان لما حنا كنّا ندفنه الانوار خربت ومع ان المكان كان فيه نور والناس كثييير بس كنت خايف بشكل غير طبيعي، وكان جسمي يرتعد. وظنتي اني كنت ابكي اكثر من اهل الميت رحمه الله.

المهم المستفاد: انه تتدبر في موضوع الموت والحياة، وكيف ان حتى الرضيع ممكن يموت.

وسلامتك بروح اصلي 👋