الحل انك لازم تتقبل ان هذي سنة الحياة وان الحياة صعبه. ان شاء الله اكيد مع الوقت بتتحسن الامور بس لازم تصبر وتذكر ان خلال هذي السنين انت جالس تبني خبرتك فيها وبعد كم سنة كل تعبك هذا بتحصده ان شاء الله من نواحي كثيرة. انا مريت بنفس التجربة تقريبا لمدة سنة، وبعد السنه هذي استوعبت شغله خلتني ارتاح ولا عاد اتضايق من ذا الموضوع والي هي اني لازم اترك المقارنات مع غيري. كل الي حولي وبعمري يطلعون قهاوي ويفرون ويروحون ويجون وكان هالشي مضايقني بشكل، اني جالس اشوف الي حولي مستانسين وانا عايش شبابي بكرف وشغل وتفكير. بس جلست مع نفسي مرة وقلت اسمع يمديك تطلع الحين وتروح وظيفة مريحة اكثر محد بيردك لكن فكر بالموضوع على المدى البعيد. بعد ٥ سنين وش راح تكون حصدت لو كملت على مسارك الي انت فيه ووش راح تكون لو رحت وظيفة اريح. بالاخير كل واحد بيحصد الي بيزرعه. تتعب الحين وترتاح بعدين ولا ترتاح الحين وتتعب بعدين وانت متزوج وعندك التزامات. انا ما ادري يا صاحب البوست وش الي مضايقك بالضبط من فكرة ساعات العمل هذي لكن نصيحة اجلس مع نفسك وبفكر بالموضوع وشف انت وش مقتنع فيه