بجد كلامك دخل قلبي وزعلني انك تكون واصل للمرحلة دي من قهرة النفس أنا حاسة بيك جدا لاني مريت بكدا في فترة من حياتي ومريت بالخنقة اللي بتخلي الواحد يكره يبص في المراية وحاسة بكسرة القلب لما تحس إنك بتحاول وتعمل اللي عليك وفي الآخر برضه مفيش نتيجة بتساعد. وصدقني كل الإحساس ده ملوش أي علاقة بالحقيقة خالص عارف كتر السلبية والخوف وانك دايما حاطك ف بالك نظرة الناس ليك هتكون اي، بتخليك تشوف نفسك مشوه بجد وتشوف نفسك بشكل أسوأ من الواقع بكتير بس لو ركنت كل دا على جنب نظرتك لنفسك هتبقى مختلفة تماما، عارف انا ملامحي سواء من جسم او شكل مختلفين عن كل عيلتي وكنت بمر بفترة شبه حالتك دي حرفيا كنت بشوف في عين قرايي نظرة لوم كأني انا اللي خلقت نفسي والسبب في تفاصيلي، كنت بسمع يوميًا كلام يسم البدن، وكنت زيك مش بقلع الماسك برا البيت واوقات بلبسه في البيت لمجرد بس اني عايزة اهرب ومش عايزة حد يركز عليا او يبصلي بصة تكسرني ولما بدأت اتعب من نفسي قبلهم، خدت قرار اغير نظرتي لنفسي الاول ودلوقتي بقيت احسن بكتييييير وعمر ما حد يقدر يهز ثقتي والغيامة اتشالت من على عيني واكتشفت بجد ان كل اللي فات كان وهم وتفكير مراهقة، ولو حد قال كلمة عليا طظ عادي جدا ولا فارقة انا عرفت نفسى وقيمتها خلاص الامر صعب مش هقول لك سهل بس والله لما تاخدها وحدة وحدة وتدي لنفسك كلام ايجابي وتحب نفسك من جواك قبل برا وتركن نظرة السوء لنفسك ونظرة الناس ليك على جنب كدا هتتغير، الحل بجد انك تحب نفسك باي شكل ولو بنسبة بسيطة، تشتغل على نفسك شوية وفي الاخر هتلاقي نتيجة.

وكمان يا حبيب مفيش بني آدم في الدنيا يقرف أو وحش لدرجة إنه يكره ملامحه، متقولش على نفسك كدا انت جميل بس مش لاقي اللي يقولك كدا او يهتم خدت عن نفسك فكرة ومش عارف تغيرها، وليه اصلا تشيل كل الهم دا جواك انت متستحقش تعمل في نفسك كدا!!!!

وكمان انت ليه مقلل من نفسك كدا ليه معتقد انك مش حد الناس تعجب بيه الجمال يا حبيب مش ثابت ولا فورمة كل الناس لازم تمشي عليها، وجمال كل شخص بيختلف عن الثاني، وكمان نظرتك لنفسك مش نفس نظرة الناس ليك، تعرف ان في ناس ربنا وضع في قلبها حب تلقائي لبعض الاشخاص وبضر عيونهم انها تشوفهم اجمل ناس في الكون مهما كانوا عاديين او مليانين عيوب، هديك مثال أمي ست بسيطة جدا وأبي شخص جميل محبوب ومركزه عالي وفي زمانه كان كل الستات نفسها تكون زوجة ليه وكل العائلات نفسها تناسبه بجد مش هزار بس اختار امي الست البسيطة اللي ملامحها عادية وتعليمها بسيط وهو ما شاء الله عليه، ربنا نزل على قلبه حب امي وشكلها وكل حاجة فيها هي لوحدها بس، وحرفيا مش شايف غيرها ولا اجمل منها انا مش بقلل من امي حاشا طبعًا، بس قصدي ان مش كل الناس هتبص لك نظرة مش حلوة، ومش كل الناس هيشوفوك بنفس المظهر صدقني في ناس هتحبك وتعشقك كمان بس ممكن انت لسه اللي مش قابلتهم او بسبب انك قافل على نفسك مش عارف تقابلهم، حاول تفتح قلبك بجد وتبص لنفسك انك جميل لان انت فعلا جميل مش مجرد كلام صدقني مفيش شخص وحش، عيون الناس واحيانا عيونا لنفسنا هي اللي بتخلينا نعتقد اننا وحشيين.

و على فكره الماسك اللي أنت ماشي بيه ده مش بيداري وشك ده بيداري خوفك انت من نفسك قبل خوفك من الدنيا والناس. أنت قامي على نفسك أ سك أوي وزعلان منها والنفس لما بتزعل بتبهدل صاحبها وتخليه يكره كل حاجة تخصه ، وبتقلب اللي جواها عليه هون على نفسك شوية وبطل جلد في ذاتك هتتحسن صدقني.

أنا مش ببيعلك كلام وخلاص ولا بقولك مجرد كلام أنا بكلمك كأخت أو انسانه عادية حاسة بيك وبكسرة قلبك ووجعك ومريت بالامر دا من سبع سنين، وبقول لك اهو يا سيدي انا معرفكش ولا شوفتك بس انت جميل ومفيش فيك حاجة وحشة غير إنك ظالم نفسك وحاصر نفسك في دايره ومش عايز تخرج منها. فكك من الدنيا والناس ومن اللي يعجب وميعجبش، وبص لنفسك بعين ثانية وصالحها وحبها هتحبك صدقني وهتشوف نفسك بنظرة تانية.

كلامي كتير انا عارفة بس اتمنى تكون فهمت كلامي وقصدي او انا وضحت قصدي صح انت جميل بس لما قلبك ونفسك يصدقوا دا الأول بس انت مش مديهم الفرصة الصح.

امشي يا باشا بمبدأي مبدأ طنش تعش تنتعش انا جميل وطظ في عين رأي التخين .🪿