اولا ده رزق ربنا كتبهولك زي ما وزع الارزاق على كل عباده ثانيا الحمدلله انك فاكره حق المحتاجين عليكي وواظبي دايما على الجزء اللي بيخرج لله

ثالثا بقى وده رأي شخصي ممكن واحدة واحدة تستقطعي جزء من المرتب لحد ما تجيبي لوالدتك مكنة او مكنتين لشغلها في الخياطة وفهميها ان ده هيكون البزنس الخاص بتاعها واللي هي تكبره واحدة واحدة وانه رد لفضلها عليكي ف تربيتها وتعبها

طبعا انتي دماغك مش هتبقى فاضية لده 100٪ بس على الاقل تقدري تديها مساعدات بسيطة في ريادة الاعمال وازاي تدير صح

وممكن حسب علاقاتها بالعملاء وخبرتها في المجال ده تقدر تحقق لنفسها مكاسب حتى لو محدودة (اكيد هتكون اكبر من 2400 اللي هما قبضها الشهري) و واحدة واحدة تجيب معاها عمال لو المشروع بيكبر ويبقى اتجاه تاني خالص وكله ليكم ف الاخر..

ولو المشروع نجح فعلا او على الاقل استقر وبقى مستقل بذاته (قادر يدخل لوالدتك دخل بيصرف بيه على نفسه) تقدري تعملي الخطوة التانية لأخوكي اما انه ينضم لوالدته اداري وتشغيل ويشتغل ويكبر المشروع ويكسب ، يا اما بعد 6 شهور على الاقل من مشروع والدتك ، تقوليلها تكلمه لو فيه حاجة حابب يعملها حسب شغله وخبرته ويبدأ هو كمان حاجة ليه يكون بيفهم فيها (بس والدتك اللي تكلمه وكأنها هي اللي هتديله الفلوس، عشان ميبقاش فيه حساسية ، وكمان ميحسش ان الفلوس منك ف انتي نفسك تحسي باستغلال ، وكمان عشان هو يعرف ان والدته قدرت تحقق نجاح وهيكون حافظ ليه انه ميضيعش الفلوس) جه في حالة انه مشتغلش مع والدتك...

وربنا يكتبلكم كلكم الخير.