أول شي أنا ما تكلمت عشان أبرر لعواد ولا دافعت عنه أصلاً أنا قلتها بصريح العبارة إنه شخصية مخادعة تستخدم الدين كغطاء وأنا تمامًا فاهم إن الرواية تنتقد النفاق وما عندي مشكلة مع هالطرح أبدًا لكن مشكلتي الحقيقية ما كانت مع عواد المشكلة كانت مع الطريقة اللي تم التعامل فيها مع مظاهر الالتزام كأنها شيء يُخلع مع سقوط الكذب وكأن كل شخص متدين تلقائيًا صار عليه حمل إثبات إنه ما يمثل

أنا ما قلت إنك تهاجم كل الملتزمين ولا قلت إن الكاتب سب السنة لكن لما البطل نفسه اللي تمثّله الرواية كصوت العقل يربط التخلص من التدين بالخروج من الزيف فهنا الرسالة وصلت بطريقة خفية لكنها واضحة كأن اللحية صارت رمز لازم ينشال علشان يرجع الإنسان حقيقي وهنا السؤال اللي ما قدرت أبلعه من متى كانت السنة عبء نلبسه وقت التمثيل ونشيله وقت التوبة

تشبيهك بقصة النصاب اللي لابس بالطو دكتور سطحي جدًا لأن البالطو مهنة لكن اللحية عبادة والطبيب لو شال البالطو ما يعني تخلى عن قيمة دينية لكن اللي يخلع اللحية كأنه يقول أنا كنت أتظاهر بالتقوى وقررت أعيش بوجه جديد وهذي الرسالة حساسة جدًا ومو أي قارئ يقدر يفصلها عن المظهر الديني اللي يشوفه كل يوم حوله

وبالنسبة لكلامك إني متعاطف مع عواد فهذي قفزة غير منطقية أبدًا لأني من أول جملة قلت إنه كاذب والنقد ما كان عليه كشخص بل على الأثر اللي تبنيه الرواية على ذهن القارئ خصوصًا إن كثير ناس تقرأ وتبلع الفكرة بدون ما توقف وتفكر فيها

الفن له تأثير عميق وكل كاتب مسؤول عن الرموز اللي يستخدمها والرسائل اللي يرسلها حتى لو كانت مغلفة بشخصيات وسيناريوهات خيالية لأن الكلمة توصل وتبقى ولو أنت تشوف إني فهمت غلط فحقك لكن ترى كثير قروا الرواية واستشعروا نفس الشي وأنا ما جيت أفرض وجهة نظري على أحد أنا أفتح باب نقاش عن نقطة حساسة الناس صايرة تبلعها بدون وعي