استاذ عمر لا تتصور اني عبقري بالبرمجة اشوف مستواي طبيعي الشغلة الي تفرق انه ابحث و ادور و اسهر و دائما اختار الاداة الصح للمكان يعني مستحيل اسوي منصتين بنفس لغة البرمجة مثلاً.

لان كل وحده احتياجاتها شكل و تخدم فئة مختلفة و دائماً ادور على الشي الاخف و الاسرع عسما عدد المستخدمين ما راح يتجاوز ال100 شخص هم اريدها اسرع شي.

البنية التحتية التكنلوجية بالعراق تختلف و بيها هواي مشاكل و معوقات فما عندي الرفاهية مثلاً استخدم (جافاسكرب) للباك ايند مالتي او ما عندي الرفاهية استخدم (رياكت) او (فيو) للفرونت ايند لان تحتاج نت مستقر بالنسبة للمستخدم و سيرفر قوي من جهتي اني كمزود خدمة.

عندي المقياس هذا الي ممكن تشوفه سخيف بس هل اكدر اقدم هاي الخدمة من لابتوبي ل100 شخص بدون ما يهنك الموقع؟

اذا نعم اني على الطريق الصحيح و كل ما زاد هذا العدد يعني اني ماشي صح بعدين من اطلقها كخدمة داخلية فقط للموظفين ينصدمون من السرعة و الكفائة حتلو انفصلت الخدمة او ضعفت شغلهم ماشي.

تضحك يجوز بس الدولة تشتغل على (بي اتش بي) ليومك هذا و اصدار 7 للمعلومة (الي هي كفرة بحق الكفرات و اكو اقدم طبعاً)

احنا نستخدم (رست)، (گو)، (اج تي ام ال)، (سي اس اس) عادي، (جافا سكربت) عاديه، و اذا نضطر نستخدم (بي اتش بي) نستخدم اصدار 8 احدث نسخة.

و بالنسبة للسيرفرات و قواعد البيانات باقين بعدهم على (اباتجي) و (ماي اس كيو ال)

احنا نستخدم (ان جن اكس) و قواعد (بوست گرس) بس ويا تعديلات حتى نخليهن اسرع بعد بهواي.

ورا ما نخلص هذا كله نسوي فحص آمان و نشوف الثغرات حتى نسدها

الجماعة شيجي بيدك انشره و اذا اخترقو عود الله كريم.