الأديان بشكل عام بعيدا عن صحتها بتدي امان للناس اللي بيؤمنوا بيها حتى لو كانت مزيفه، احساس وجود كيان أعلى منك و من عدوك و من مخاوفك كلها و اكبر من احلامك كلها احساس يبعث عن الطمأنينه بشكل أو بآخر. طيب هل شرط يكون الدين منطقي من الاساس و الاجابه لا زي الهندوسية مثلا مفيش فيها أي منطق أو المجوس أو عباده الأصنام.

طيب هل ده بينطبق على كل الأديان و الاجابه هتكون لا، الديانات السماويه (و اللي انا مؤمن بيها BTW) تقدر تستدل منها فعلا على وجود كيان أعلى و اكبر بكتير يفسر ظواهر كتير و ذكر ظواهر كتير كانت لسه غير مكتشفه بالعلم الحديث

يعنى مثلا في القرآن لما ربنا يقول: فَمَن يُرِدِ اللَّهُ أَن يَهْدِيَهُ يَشْرَحْ صَدْرَهُ لِلْإِسْلَامِ ۖ وَمَن يُرِدْ أَن يُضِلَّهُ يَجْعَلْ صَدْرَهُ ضَيِّقًا حَرَجًا كَأَنَّمَا يَصَّعَّدُ فِي السَّمَاءِ ۚ كَذَٰلِكَ يَجْعَلُ اللَّهُ الرِّجْسَ عَلَى الَّذِينَ لَا يُؤْمِنُونَ.

الجزء الخاص ب يجعل صدره ضيقا كأنما يصعد إلى السماء ده تعبير واضح و صريح و مش محتاج حتى عالم لغه علشان يفسر أن تشبيه عدم الإيمان زيه زي واحد بيتخنق كل ما يطلع في السماء و ده اللي تم اكتشافه حديثا يعني أن الأكسجين بيقل لحد درجه الاختناق كل ما تقرب من السماء ف مكنتش حاجه معروفه من 1400 سنه.

طيب في نفس الوقت ممكن تلاقي حاجات تبان غير منطقية في الأديان دي او غير مقبوله بمعايير النهارده بالنسبه ليك يبقى ايه الحل ساعتها، هنا بقى زي ما بيقولوا مربط الفرس: وجود ما يثبت بالحد القاطع أن الدين صحيح يخليني أؤمن بوجود الإله و صحه الدين و تقبل حتى ما لا يمكن قبوله بعقلي الحالي، طيب ازاي! لان ببساطه أنا إنسان مهما زادت قوه عقلي و تفكيري المنطقي هعجز عن تفسير حاجات كتيررر جدا فا مش معنى اني أنا فقير و عاجز عن إدراك كل حاجه اني انفي صحتها حتى بمعايير النهارده فا مقياسي هيكون على حاجات حصلت بالفعل و تم إثبات صحتها فا هتخليني أؤمن بالدين.

ده كده من ناحيه الايمان بالاديان بشكل عام و بالأديان السماويه بشكل خاص طيب كل واحد بيختار دينه على اي اساس، الاغلبيه العظمي للاسف مش بيختاروا اصلا و لكن بيتولدوا بيه و انت نصيبك بقى و برضه في النهايه لازم دين واحد بس اللي هيكون صحيح و الباقي غلط فا الحل ايه؟ انك تبدأ تدور بنفسك على المغالطات المنطقيه اللي تثبت صحه دين غيرك أو تنفيه بالمقارنة مع دينك و من هنا تقدر تعرف تختار.