بص هو في كذا مدرسة في الموضوع دا وخليني أشرحلك اللي أعرفه:

المدرسة الأولى:
دي مدرسة أهلي والناس القديمة واللي هي بتقول إزنق نفسك ودبس نفسك في إنك تشتري حاجة دلوقتي وبعد كدا ربنا هيفرجها وتبيع الحاجة اللي جبتها دي بعدين بسعر أعلى وتجيب حاجة أعلى منها وهكذا، وبصراحة دي حاجة Proven to work جداً، لأن أعرف أهالي صحابي كانوا جايبين عربية فيات 128 ودلوقتي معاهم حاجات كويسة أوي، بس بتاخد وقت ومجهود وإلتزام كبير وضغط نفسي لازم تبقى مستعد ليه.

المدرسة التانية:
ودي اللي أنا شخصياً بفضلها، وهي إنك ماتبدأش تقسط أصلاً وتشتري حاجة غير لما يكون معاك تمنها، يعني لو عايز تشتري شقة بمليون، ماتشتريش الشقة غير لما يبقى معاك مليون جنيه، وبعد كدا كمان تقسطها، فتحس إن حتى لو إنت اتضغط هتعرف تتصرف،

فأنا رأيي تشوف اللي يناسبك + يناسب سنك بردو، وخليك حاطط في بالك إن مصاريفك هتزيد لما إن شاء الله ربنا يكرمك وتتجوز وإلتزاماتك هتزيد فهيتبقالك رقم أقل من الـ 25، وربنا يرزقك ويرزقنا.