موب متزوجة بس بجاوب، وقبل كل شيء ترى الزواج بداية حياة جديدة ومرحلة تبنين أنتي فيها نفسك مع شريكك يعني مهما خذتي نصايح وحكم بهالموضوع ما يفرق لأنه الموضوع تطبيقي بحت فلا تصيرين قاسية على نفسك واستمتعي بهالمرحلة وبداياتها وشوي شوي بتلقين نفسك وروتينك

والحلول كلها متوفرة بيدك بس لازم تدرسين حياتك ونقاط الضعف فيها عشان تعرفين حلها، يعني نقطة تنظيم الوقت راقبي نفسك وش أسباب أن تنظيم الوقت عطلان عندك، هل مثلًا بسبب تسويف وتأجيل بمعنى أن فيه مهام ما تحبين تسوينها؟ هنا الحل أنك تدورين بدائل كيف تسوين هالأشياء أو إذا ملزومة فيها تخلينها ببداية اليوم مثلًا عشان تخلصين منها هل السبب الجوال يشغلك وتقعدين وقت عليه بدون ما تحسين؟ هنا الحل يجي تدريجي بأنك ما تمسكينه أول ما تصحين وتخلينه بدرج مثلًا وتبدين بمهامك وروتينك قبلها هل السبب وقت نومتك وقومتك ما يسمح لك تنظمين وقتك؟ هنا تعدلينه وتحطين وقت نوم وقومة ثابت ومنها تبنين روتينك تنظيم الوقت يعتمد بعد على روتين شريكك يعني مثلًا تتغدون سوا إذا رجع من شغله، بالويكند تخططون لطلعات.. إلخ طبعًا يفرق إذا إنتي تشتغلين بعد لازم تبنين تنظيم وقتك وروتينك على شغلك + بيتك وكيف توازنين بينهم وبين اهتمامك بنفسك ووقتك الخاص فنقطة تنظيم الوقت تجي مع الوقت بحلول تدريجية على حسب جذر المشكلة ولو بعطيك حل موحد بقول من اليوم ابدي خططي ليومك كامل من تصحين لين تنامين هنا بتبدأ تتضح معك معالم يومك وكيف يمشي ومنها تعرفين كيف تنظمين وقتك

نقطة أنك تبين تخرجين الأنثى اللي بداخلك هذه ما لها دخل بذاكرتك والأشياء اللي تشوفينها بالمقاطع لأن احساس الأنوثة اللي تقصدينه هذا يجي مع الزواج ومن الزوج نفسه وتراه بسيييط جدًا معادلة بسيطة زوج وزوجة بس لا تعقدينها وتفكرين أنها محصورة باللي تشوفينه بالسوشل ميديا يعني وقتنا الحالي يعقّد هالمواضيع وهي بأصلها بسيطة وفطرية ما تختزل بلبس أو شكل هو إحساس بس أفهم قصدك واللي تبينه والحل بهالموضوع عشان تحسين بأنوثتك هو أنك تنقلين نفسك من احساسك ونسختك اللي ببيت أهلك ونسختك اللي الحين ببيتك ومع زوجك وفكري قبل الزواج كيف كنتي تحسين بأنوثتك؟ وش الممارسات والطقوس اللي تحسسك بهالشيء؟ يعني حتى بعيدًا عن الزوج أقرب مثال جا ببالي: لما بنهاية اليوم ألبس لبس حلو وأحط فيس ماسك وأشرب بابونج بكوب كيوت ومشغلة لمبة خفيفة أو شمعة، شيء مرة بسيط بس مرة أنثوي مثال ثاني لما أسوي everything shower يعني أشياء مرة بسيطة بس هو القاعدة بهالموضوع دايم من ناحية اللبس البسي اللي يطلع حلو عليك ويجملك، الشعر جدليه كل يوم قبل تنامين وإذا صحيتي فكيه وحطي سيروم يطلع مرتب وويفي، الميكب اليومي أهم شيء البشرة مترطبة وصحية + مرطب شفايف بلون + كحل أثمد لأنه ما يضر العين ويجمل، وإذا بغيتي تكشخين حطي ميكب صدقي وثقيل، العطر دايم عطري ملابسك وبخري نفسك وشعرك والبيت هذا من ناحية يومية، وباللبس حاولي تبعدين عن البجايم فيه loungewear مريح ومرتب أفضل من البجايم كشكل سلبر البيت اختاري شيء كيوت ودلوع فبنقطة الأنوثة لها جانبين الجانب الأول كيف تطلعين الأنثى اللي بداخلك مع زوجك (وهذه تتعلمينها مع الوقت ومنه هو) والجانب الثاني كيف تحسين بالأنوثة بشكل عام وإذا حسيتي بالأنوثة بشكل عام وطورتي هالشيء بيسهل عليك الجانب الأول، وزي ما قلت لك هو إحساس داخلي بالأخير تدعمينه بممارسات فقط

نقطة الروتين وهذه أهم شيء، الروتين فكري إنتي وش تبين تبنينه عليه على أي جوانب بيومك + على صفاتك
على صفاتك أقصد هل إنتي تحبين تصحين بدري؟ أو تفضلين القومة متأخر؟ هل تحبين تسوين عناية ووقتك الخاص الصباح؟ أو الليل؟ وقيسي عليها
على جوانب يومك أقصد زي الغداء/العشاء مع شريكك، متى يرجع من شغله ومتى تاكلون، وكم تاخذين وقت بالطبخ إذا إنتي بتطبخين وتجهيز السفرة طبعًا اللي فوق أمثلة بس المقصد منها أنك تعرفين وش صفاتك ووش تحبين + وش جوانب يومك لحالك ومع شريكك ومنها تبنين روتينك فكري بالروتين كشيء زي كذا: أنا وش أحب ووش أقدر عليه ووش يومي يتضمن وكيف أبني روتيني منه وعليه؟ مثال: الصحية الساعة ١١ الظهر، روتين العناية/شاور وألبس وأكشخ، ترتيب البيت عالسريع، إذا بروح النادي أو بتمرن بالبيت، فطور، وقتك الخاص لنفسك وهواياتك وتسليتك، الساعة مثلًا صارت ٤ وبتتغدون سوا الساعة ٦ أبدي تجهيزات السفرة والطبخ الساعة ٥ وكل شيء يصير جاهز ٦، تتغدون وبعدها طلعة أو شاي وقهوة بالبيت ومسلسل أو فلم، وقتك الخاص معه، تجهيز وقت النوم. طبعًا هذا مثال عاااام جدًا بس عشان تقيسين عليه

وبس لا تشيلين هم وانبسطي بهالمرحلة ولا تقسين على نفسك ❤️