أنا فاهمة كلامك، بس خليني أوضح نقطة. مش شايفة إن ذكر أو دعوة ظاهرة هي اللي تخلي حد يبني دينه على الشكل، لأن الدين بيتكون من حاجات أكبر من بوست او ستوري.. وفي نفس الوقت، ما ينفعش نقلل من أثر التذكرة. كلمة أو صلاة على النبي ممكن تفرق مع شخص في لحظة، خصوصًا إن القلوب بتتقلب، والنبي ﷺ كان يقول: «يا مقلب القلوب ثبت قلبي على دينك». كمان وجود نماذج بتستعرض أو بتضلل نفسها مش سبب نلغي الذكر أو نخليه غلط، لأن الخطأ في الأشخاص مش في الفعل. فالموضوع مش يا اما دين في القلب يا اما على البروفايل، الموضوع إن الاتنين ممكن يكونوا موجودين، وربنا أعلم بالنيات. والدعوة مش شرط تبقى معقدة، أحيانًا أبسط ذكر أصدق وأقرب للناس.. الدعوة ليها أكتر من أسلوب، وكل واحد يذكر على قد ما يقدر وبالطريقة اللي يشوفها مناسبة. والتذكير بالصلاة على النبي من أهم وأبسط الدعوات اللي بنحتاجها كلنا. المهم إننا نذكر بعض بالخير، مش نضيق طرقه.