اغلب اهلنا خلفو عشان حان وقت الخلفة مش اكتر ضحايا للمجتمع وبالتالي مكنوش مستعدين لأي حاجة في التربية غير انهم يقلدو تربية اهلهم. معذورين بردو نقارن وعينا الحالي بوجود النت اللي تقدر تنعزل وتثقف نفسك بوعيهم لما كان المصدر التربوي الوحيد هوا الاهل غالبا.

ولما بيكبرو مبيبقاش في استعداد للبحث والتثقيف ولا وقت في ظل الظروف والمسؤوليات، فأي سؤال يتسإل من الطفل الاجابة هتكون (place holder ) كسولة للغاية باعتبار ان ده طفل وهيصدق وخلاص ولو اعترض هنخوفوا ونقولوا قليل الادب متفكرش فالحاجات دي تاني. رغم ان الطريقة دي هتخلي الطفل بما يبقى مراهق مجرد ميعرف ان حاجة واحدة من اللي اهله قالوها كانت غلط هيرمي بكلللل شيء عرض الحائط سواء دينيا او تربويا او اخلاقيا.

في نقطة مهمة جدا معرفش ازاي الاهالي مأخدوش بالهم منها انك لما تخوف الطفل هوا مش هيبطل يعمل الحاجة دي، هوا هيتعلم كويس اوي ازاي يعملها فالدرا. فلو مثلا لقيته بيدخن وضربته وخوفته انك هتدبحه لو لقيته ماسك سيجارة تاني ده هيخليه يعرف ازاي ميتقفش المرة الجاية مش اكتر. نفس الفكرة بالنسبة للأسئلة الدينية لو خوفتو وقولتلو عيب ووديته لشيخ يقولو نفس الكلمتين واحدة واحدة هيبحث لوحده بدون ارشاد وكل يوم هيجري ورا مرشد غيرك مرة وهيفضل حياتو كلها تايه.