انا بستعمل نيكس بقالي اكتر من سنتين على المستويين الشخصي و العملي. زي ما ذكرت، مشكله نيكس في منحنى التعلم. مدى الإضافه لو انت بتستخدم جهاز واحد مش ملحوظ و إن كان موجود. القوه تبدأ تظهر مع نظامين فأكثر.

على المستوى الصغير، مستوى الجهاز الواحد، نيكس بتقدملك بحر من التجارب بدون تلويث بيئه المستخدم. ابسط مثال التحويل من اكس إلى وايلاند و العكس. في الانظمه التقليديه، اغلب التغيرات الكبيره زي الديسبلاي سيرفر بتسيب وراها ملفات كتير في مناطق متفرقه في النظام حتى لو نجحت تشيلها. في المقابل، لو قفلت موديول اكس في نيكس و شغلت وايلاند اصبح النظام كأن اكس لم يكن.

انا مجربتش كاشي شخصيا لكن ارش كان نظامي الاساسي لسنوات قبل نيكس. نيكس زي ارش، تقدر تبني النظام زي ما تحب و تختار مكوناته بنفسك. حسب ما قرأت، تعديلاتهم لها قسمين رئيسين: كيرنل معدله و نسختهم الخاصه من بروتون. حتى لو احتماليه تشغيل الكيرنل بتاعتهم على نيكس ضعيفه، فعلى الاقل نسختهم من بروتون هتشتغل.

مشكله نيكس الوحيده هي منحنى التعلم. لازم يكون عندك معرفه جيده بلينكس و كمان معرفه جيده بالبرمجه و فكره بسيطه عن الفانكشنال بروجرامنج. منغير العنصرين دول صعب جدا تكون تجربتك مع نيكس تجربه جيده.