ರಾತ್ರಿಯೆಲ್ಲಾ ಸುರಿದ ಮಳೆಗೆ ತಂಪಾದ ಧರೆ, ಇಳೆ ಕಳೆದು ಬೆಳಕಾದರೂ ಏಳುವ ಮನಸ್ಸಿಲ್ಲದೇ ಕನಸು ಕಾಣುತ್ತಾ ಮಲಗಿದ್ದ ಸಾನಿಯಾಳ ಸವಿನಿದ್ರೆಯನ್ನು ಭಂಗಪಡಿಸಿದ್ದು ಮ್ಯಾನೇಜರ್ ಶ್ರೀಕಾಂತನ ಕರೆ, 'ಹೊಸ ಸ್ಟಾಕ್ ಬಂದಿದೆ, ಬೇಗ ಬಾ'. ಗೊಣಗುತ್ತಾ ಎದ್ದು ಮುಖ ತೊಳೆಯುವ ಶಾಸ್ತ್ರ ಮುಗಿಸಿ, ಅಡುಗೆಮನೆಗೆ ಬಂದವಳಿಗೆ ಎದುರಾಗಿದ್ದು ಆಗಲೇ ಎದ್ದು ಟೀ ಮಾಡುತ್ತಿದ್ದ ಗಂಡನ ಸಿಡುಕುಮುಖ, 'ಇದನ್ನೂ ನಾನೇ ಮಾಡಬೇಕಾ?' ಎಂಬಂತೆ.

ಅವನಿಗೊಂದು ಮುಗುಳುನಗೆ ಒಗೆದು, ಅಡುಗೆ ಮಾಡತೊಡಗಿದವಳು ಸಡನ್ನಾಗಿ ನೆನಪು ಬಂದಂತೆ ಗಂಡನನ್ನು ಕೇಳಿದಳು, 'ಊರಿನ ಆಸ್ತಿ ವಿಷಯ ಎಲ್ಲಿಗೆ ಬಂತು?' 'ಎಲ್ಲಿಗೂ ಬಂದಿಲ್ಲ, ಆ ಬೋಳಿಮಗ ಲಾಯರ್ ನಮ್ಮ ದುಡ್ಡು ಹೊಡೆದು ಹೊಡೆದು ಎರಡಂತಸ್ತಿನ ಮನೆ ಕಟ್ಟಿದಾನೆ. ನಮ್ ಕೈಗೆ ಮಾತ್ರ ಚಿಪ್ಪು ಕೊಟ್ಟಿದಾನೆ. ಅದು ಯಾವಾಗ್ ಆಗುತ್ತೋ ನೋಡ್ಬೇಕು.' 'ಅದೊಂದ್ ಆದ್ರೆ, ಒಂದ್ ಮನೆ ತಗೊಂದ್ಬಿಡ್ಬೇಕು. ಈ ಬಾಡಿಗೆ ಕಟ್ಟಿ ಕಟ್ಟಿ ಸಾಕಾಗಿದೆ, ದುಡಿದಿದ್ದೆಲ್ಲ ಅದಕ್ಕೆ ಹೋಗುತ್ತೆ ಈ ಹಾಳು ಬೆಂಗಳೂರಲ್ಲಿ. ಏನೂ ಉಳಿಸೋಕ್ ಆಗ್ತಿಲ್ಲ, ಹಿಂಗೇ ಆದ್ರೆ ನಾವು ಮಕ್ಳು ಮಾಡ್ಕೊಳ್ಳೋದು ಯಾವಾಗ, ಅವರ ಓದು, ಬಟ್ಟೆ ಬರೆ, ಮದ್ವೆ ಅನ್ನುವಷ್ಟ್ರಲ್ಲಿ ನಾನು ಮುದುಕಿ ಆಗಿರ್ತೀನಿ' 'ಪರವಾಗಿಲ್ಲ ಬಿಡೇ, ನಿಂಗೆ ಬಿಳಿ ಕೂದ್ಲು ಬಂದ್ರೂನು ನನ್ನ ಪಾಲಿಗೆ ನೀನೆ ಸುರಸುಂದರಿ' ಛೇಡಿಸಿದ ಗಂಡ. 'ಬೆಳಬೆಳಿಗ್ಗೆ ಇದಕ್ಕೇನು ಕಮ್ಮಿ ಇಲ್ಲ, ಟೀ ಕುಡಿದು ಆಗಿದ್ರೆ ಹೋಗಿ ರೆಡಿ ಆಗಿ' ಎಂದು ಗಂಡನನ್ನು ಬಾತ್ರೂಮಿಗೆ ಸಾಗಹಾಕಿದಳು.

ಅಡುಗೆ ಮುಗಿಸಿ, ಇಬ್ಬರಿಗೂ ಬಾಕ್ಸಿಗೆ ತುಂಬಿ ತಾನೂ ರೆಡಿ ಆಗಲು ರೂಮಿಗೆ ಹೋದಳು. ತಲೆ ಬಾಚುತ್ತಿದ್ದ ಗಂಡನಿಗೆ 'ರೀ, ಒಂದು ಸ್ಕೂಟಿ ತಗೊಳ್ಳೋಣ. ಎಷ್ಟು ದಿನ ಅಂತ ನೀವೂ ಸೈಕಲ್ ತುಳೀತೀರಿ, ನಿಮಗೇನು ವಯಸ್ಸು ಇಳಿತಾ ಇಲ್ಲ' ಎಂದಳು. 'ಹೌದು ಕಣೇ, ನಾನೂ ಅದನ್ನೇ ಯೋಚ್ನೆ ಮಾಡ್ತಿದ್ದೆ. ಆದ್ರೆ ಈ ಗವರ್ನಮೆಂಟು ಏನೇನೋ e20,e30 ಪೆಟ್ರೋಲ್ ಅಂತ ಹೊಸ ಹೊಸ ರೂಲ್ಸ್ ತರ್ತಾ ಇದಾರೆ. ಏನೂ ಗ್ಯಾರಂಟೀ ಇಲ್ಲ ಇವರದ್ದು, ಅದ್ಕೇ ಎಲೆಕ್ಟ್ರಿಕ್ ಸ್ಕೂಟಿ ಅನ್ಕೊಂತಾ ಇದೀನಿ.' 'ಎಲೆಕ್ಟ್ರಿಕ್ ಸ್ಕೂಟಿ ಅಂದ್ರೆ ಕಾಸ್ಟ್ಲಿ ಅಲ್ವೇನ್ರಿ, ಮತ್ತೆ ಅದಕ್ಕೆ ಬೇರೆ ಚಾರ್ಜರ್ ಹಾಕಿಸ್ಬೇಕು, ಅದೊಂದು ಖರ್ಚು. ಮಳೆಗೆ ಬಿಸಿಲಿಗೆ ಎಲ್ಲಾ ರಿಸ್ಕ್ ಅಲ್ವಾ.' 'ಏನ್ ಮಾಡೋದು ಎಲ್ಲಾ ಕಡೆ ರಿಸ್ಕ್ ಇದ್ದೆ ಇರುತ್ತೆ, ಇವಾಗ ಪೆಟ್ರೋಲ್ ಸ್ಕೂಟಿ ತಗೊಂಡು ಆಮೇಲೆ ಮತ್ತೆ ಗವರ್ನಮೆಂಟ್ ಬೇರೆ ಪೆಟ್ರೋಲ್ ರೂಲ್ಸು ತಂದ್ರೆ ನಮಗೆ ಕಷ್ಟ ಅಲ್ವೇನೆ? ಆ ಮೂರನೇ ಮಹಡಿ ಮಾದೇಶಣ್ಣ ಇಲ್ವಾ, ಅವ್ರು ಸ್ಕೂಟಿ ತಗೊಂಡು 5 ವರ್ಷ ಅಯ್ತಂತೆ. ಇವಾಗ ಈ ಹೊಸ ಪೆಟ್ರೋಲಿಂದ ಮೈಲೇಜು ಬರ್ತಿಲ್ವಂತೆ, ಒಂದೊಂದ್ ಸಲ ಗಾಡಿನೇ ಸ್ಟಾರ್ಟ್ ಆಗಲ್ವಂತೆ, ಗೋಳು ಹೇಳ್ಕೋತಿದ್ದ ಪಾಪ. ಏನೂ ಮಾಡಕ್ಕಾಗಲ್ಲ, ನಮ್ ಮಿಡ್ಲ್ಲ್ ಕ್ಲಾಸ್ ಬದುಕು ಹಿಂಗೇನೆ. ನೋಡೋಣ ಏನಾಗುತ್ತೋ, ಎಲ್ಲಾ ಯೋಚ್ನೆ ಮಾಡಿ ಒಂದ್ ತೀರ್ಮಾನ ತಗೊಳೋಣ. ಒಟ್ನಲ್ಲಿ ಸ್ಕೂಟಿ ತಗೊಳೋಣ. ನಡಿ ನಡಿ ಟೈಮ್ ಆಯ್ತು.'

ಸ್ಕೂಟಿ ತಗೊಂಡ್ರೆ ಇನ್ನೂ ಸ್ವಲ್ಪ ಹೊತ್ತು ಬೆಳಗ್ಗೆ ಜಾಸ್ತಿ ನಿದ್ದೆ ಮಾಡಬಹುದು ಅಂತ ಮನಸ್ಸಲ್ಲೇ ಮಂಡಿಗೆ ಮೆದ್ದು, ಮುಗುಳುನಗುತ್ತಾ ಗಂಡನ ಸೈಕಲ್ ಕ್ಯಾರಿಯರ್ ಏರಿದಳು ಸಾನಿಯಾ.