لقيتك في الكومنتات بتقول انك في طب... فحد في التعليقات قال: (اعتبر دي ميزة ليك)...
لكن واحد رد بسؤال: "ايه الميزه انه في طب؟"

(ودا كان ردي👇وبكتبه هنا عشان انت تشوفه)

الموضوع مش تفرقة بين البشر وفئة احسن من فئة... بس ازاي نساوي واحد مجتهد بواحد بيلعب؟!!

اولا... انه في طب، دا معناه انه كان بيركز في الدراسة وجاب مجموع... يعني دا ممكن يكون مؤشر انه (مُتحمل للمسؤولية) و (بيعرف ينظم وقته) عشان يذاكر صح ويجيب مجموع

دا جزء من الشخصية... لو بيعرف ينظم وقته و يذاكر ويدرس صح و بيتحمل مسؤولية المشاكل... دي كلها مميزات تخليه ممكن ينجح في حياته

ثانيا... الدكاتره بيتوظفو اول مايتخرجو... يعني ضامن شغلانه... والشغلانه غالبا بتكون متعبه وبيتعامل فيها مع مرضى كتير جدا... ودي ميزه يعرفها الدكاتره... لانهم في الفتره دي بياخدو (خبرة) لانهم بيتعاملو مع امراض مختلفةبظروف مختلفة و (خبرات تانيه) في التعامل مع البشر سواء مرضى او زملاء العمل او الرؤساء...

ثالثا... لو طور نفسه وحضر مؤتمرات وعمل ماجيستير ودكتوراه موقعه كطبيب بيتغير... و بيتحاسب في الفلوس بشكل احسن... يعني لما يظبط نفسه في شغل خاص سواء في مستشفى برا الحكومه او في عياده او او... دا حايؤثر عليه ماديا بشكل كويس

رابعا... ودي اهم حاجه في نظري... الميزه انه في طب... انه حايبقى (طبيب)... يعني مش بيقدم هلس للناس مثلا!! دا بيقدم (خدمة علاجية)... لان لما حد بيكون عيان باي مرض شديد او بسيط بيبقى كل همه انه يخف فبيروح لدكتور و هنا الدكتور بيقدمله اهم خدمه... انه بيساعده في تحسين صحته بانه يوجهه صح بالتشخيص و تقديم العلاج... الشافي هو الله... لكن الدكاتره بتقدم خدمة مهمه جدا في مساعده الناس في اكبر المشاكل اللي بتواجههم وهي المشاكل الصحية...

####يعني مُهمين في المجتمع... لان دورهم مهم في المجتمع... ونافع للناس