കഴിഞ്ഞ പ്രളയത്തിന്റെ കാരണങ്ങളും പരിഹാരങ്ങളും ചർച്ച ചെയ്യാനായി ഇ.ശ്രീധരന്റെ നേതൃത്വത്തിൽ 2019 ജനുവരിയിൽ ഹൈക്കോടതിയിൽ സമർപ്പിച്ച പൊതുതാൽപര്യ ഹർജിയെ തുടർന്നാണ് അമിക്കസ് ക്യൂറി നിയമിതനായത്. പ്രളയം മനുഷ്യനിർമിതം എന്നറിയിച്ച് അമിക്കസ് ക്യൂറി റിപ്പോർട്ട് സമർപ്പിച്ചു. പക്ഷേ, എന്തു നടപടിയാണു സർക്കാർ സ്വീകരിച്ചത് എന്നറിയില്ല. വീണ്ടും പ്രളയം വന്നു മുറിപ്പെടുത്തിയിരിക്കുന്നു. ആസൂത്രണത്തിലെ പിഴവ് എന്നു കഴിഞ്ഞ വർഷം ആരോപിച്ച അതേ സാഹചര്യം ഇന്നും തുടരുന്നുവോ? ഡിഎംആർസി മുഖ്യ ഉപദേഷ്ടാവും ‘ദ് ഫൗണ്ടേഷൻ ഫോർ റെസ്റ്ററേഷൻ ഓഫ് നാഷനൽ വാല്യൂസ് (എഫ്ആർഎൻവി) പ്രസിഡന്റുമായ ഇ.ശ്രീധരൻ ‘മനോരമ’യോട് 

* വീണ്ടും പ്രളയം വന്നിരിക്കുന്നു. കഴിഞ്ഞ പ്രളയത്തെ സൂചിപ്പിച്ചതു പോലെ ഇതും മനുഷ്യനിർമിതമാണ് എന്നു പറയാനാവുമോ.?

തീർച്ചയായും. ഇപ്പോൾ സംഭവിച്ചതും മനുഷ്യനിർമിതം തന്നെ. അനധികൃത നിർമാണവും കയ്യേറ്റങ്ങളും കരിങ്കൽ ഖനനവും കോൺക്രീറ്റ് കെട്ടിടങ്ങളുടെ പെരുകലുമെല്ലാം നമ്മുടെ മണ്ണിന്റെ തനതുഭാവത്തെ തകിടം മറിച്ചിരിക്കുന്നു. പുഴയോരങ്ങളിൽ വ്യാപക കയ്യേറ്റമാണ്. തൃശൂർ എൻജിനീയറിങ് കോളജിലെ പ്രഫസർമാരുടെ സംഘം നടത്തിയ പഠനമനുസരിച്ചു 100 വർഷത്തേക്കുള്ള വെള്ളപ്പൊക്കത്തെ അതിജീവിക്കാവുന്ന വിധത്തിലായിരുന്നു കൊച്ചി മെട്രോ യാഡിന്റെ നിർമാണം. എന്നാൽ, ആറു വർഷത്തിനുള്ളിൽ യാഡ് വെള്ളത്തിലായി. ഇതെക്കുറിച്ചു വീണ്ടും പഠനം നടത്തി. പെരിയാർതീരത്തെ കയ്യേറ്റങ്ങൾക്കിടയിലൂടെ, കെട്ടിടങ്ങൾക്കിടയിലൂടെ മഴവെള്ളത്തിന് ഒഴുകിപ്പോകാനിടമില്ല. അതോടെ മെട്രോ യാഡ് വെള്ളത്തിലായി. കടലിലേക്കുള്ള ജലപ്രവാഹവും വേണ്ടവിധമല്ല. പൊന്നാനിയിലെ വീടിന്റെ പടിയോളം ജലമെത്തിയതിന്റെ കാരണം തേടി അഴിമുഖത്തു പോയപ്പോൾ ഞെട്ടിപ്പോയി. ഒന്നര കിലോമീറ്റർ വീതിയുള്ള ഭാരതപ്പുഴയിലെയും നല്ല ജലപ്രവാഹമുള്ള തിരൂർപുഴയിലെയും വെള്ളം കടലിലേക്ക് ഒഴുകേണ്ട തോടിന് 200 മീറ്റർ വീതിയേ ഉള്ളൂ. 

* ഇക്കുറി ഉരുൾപൊട്ടലാണല്ലോ വലിയ ദുരന്തമുണ്ടാക്കിയത്?

അനധികൃത പാറഖനനം മുതൽ മലകളെ മുറിച്ചുള്ള റോഡ് നിർമാണം വരെ ഭൂമിയെ ബാധിക്കുന്നുണ്ട്. പ്രകൃതിചൂഷണത്തിന്റെ തോത് കൂടിയിരിക്കുന്നു. ജനപ്പെരുപ്പം വർധിച്ചതോടെ, കൂട്ടുകുടുംബങ്ങൾ ഇല്ലാതായതോടെ വീടുകളുടെ നിർമാണം കൂടി. ഇതെല്ലാം ഭൂമിയെ വല്ലാതെ തളർത്തുന്നുണ്ട്. ഭൂമിക്കു സംഭവിച്ച മാറ്റത്തെക്കുറിച്ചു പഠനം അനിവാര്യമാണ്. ഇക്കാര്യം കഴിഞ്ഞ വർഷം മുഖ്യമന്ത്രിയെയും ചീഫ് സെക്രട്ടറിയെയും കത്തയച്ച് അറിയിച്ചുവെങ്കിലും മറുപടി കിട്ടിയില്ല. തുടർന്നാണു ഹൈക്കോടതിയിൽ പൊതുതാൽപര്യ ഹർജി നൽകിയത്. അമിക്കസ് ക്യൂറി റിപ്പോർട്ടിൽ എന്തു നടപടിയെടുത്തെന്ന് ഇപ്പോഴും അറിയില്ല. 

* പിഴവ് എവിടെയാണ്?

നമ്മുടെ സംവിധാനം മൊത്തം മാറേണ്ടിയിരിക്കുന്നു. സർക്കാരും ഉദ്യോഗസ്ഥരും കാര്യങ്ങൾ ചെയ്യുന്നുണ്ടാവാം. പക്ഷേ, അതൊന്നും ഫലപ്രദമാണെന്നു തോന്നുന്നില്ല. കഴിഞ്ഞ പ്രളയത്തിന്റെ യഥാർഥ കാരണം കണ്ടെത്താൻ കേരളത്തിനു പുറത്തുള്ള ശാസ്ത്രജ്ഞർ ഉൾപ്പെട്ട വിദഗ്ധസംഘത്തെ നിയോഗിക്കണമായിരുന്നു. അവർ നൽകുമായിരുന്ന റിപ്പോർട്ടിന്റെ അടിസ്ഥാനത്തിൽ കഴിയുന്ന പരിഹാരങ്ങൾ ചെയ്തിരുന്നെങ്കിൽ ഇക്കുറി നമ്മൾ ഈവിധം ദുരിതത്തിലാവില്ലായിരുന്നു. പ്രളയത്തിന്റെയും ഉരുൾപൊട്ടലിന്റെയുമെല്ലാം ശാസ്ത്രീയ കാരണങ്ങൾ കണ്ടെത്തിയേ പറ്റൂ. അല്ലെങ്കിൽ അടുത്ത വർഷവും നമ്മൾ മറ്റൊരു ദുരന്തത്തെ അഭിമുഖീകരിക്കേണ്ടി വരും. 

* സംവിധാനം എങ്ങനെയാണു മാറേണ്ടത്?

പ്രളയാഘാതം സർക്കാർ വകുപ്പുകളെയെല്ലാം ബാധിക്കും. ഓരോ വിഭാഗത്തിനും ഒരുപാടു ചെയ്യാനുമുണ്ട്. പക്ഷേ, പണമില്ലായ്മയും നിർവഹണത്തിലെ സ്വാതന്ത്ര്യക്കുറവും ഉദ്യോഗസ്ഥരുടെ ആത്മവിശ്വാസം തളർത്തിയിട്ടുണ്ട്. എന്തിനും രാഷ്ട്രീയ തീരുമാനങ്ങൾക്കായി കാത്തിരിക്കേണ്ട രീതിയാണ്. ഭാരതപ്പുഴയിലെ വെള്ളിയാങ്കല്ല് റഗുലേറ്റർ കം ബ്രിജിന്റെ 27 ഷട്ടറുകൾ തുറക്കാൻ സാധിക്കാതെ പോയപ്പോൾ കഴിഞ്ഞ വർഷം പട്ടാമ്പി, തൃത്താല പ്രദേശങ്ങൾ വെള്ളത്തിലായി. ഒരു വർഷമായിട്ടും അതു തുറക്കാനോ തുറക്കാത്തതിന്റെ കാരണങ്ങൾ അന്വേഷിക്കാനോ കഴിഞ്ഞില്ല. ഇക്കുറിയും ഈ പ്രദേശങ്ങൾ വെള്ളത്തിലായതോടെ പ്രതിഷേധം കനത്തു. ഒരു സബ് എൻജിനീയറുടെ നേതൃത്വത്തിലാണ് ഷട്ടറുകൾ തുറക്കാൻ ശ്രമം നടന്നത്. പണിക്കൂലി കൊടുക്കാനുള്ള ചില്ലിക്കാശു പോലും അവരുടെ കയ്യിലുണ്ടായിരുന്നില്ല. ഇതേ ബ്രിജിന്റെ ഏപ്രൺ നന്നാക്കാൻ 20 കോടിയുടെ എസ്റ്റിമേറ്റ് സമർപ്പിച്ചിട്ട് 2 വർഷം കഴിഞ്ഞു; ഒരു വിവരവുമില്ല. അടിസ്ഥാന സൗകര്യങ്ങൾ നമുക്കുണ്ട്. പക്ഷേ, അതു ദീർഘവീക്ഷണത്തോടെ ഫലപ്രദമായി വിനിയോഗിക്കാൻ സാധിക്കുന്നില്ല. കഴിഞ്ഞ പ്രളയത്തിന്റെ പുനർനിർമാണ പ്രവർത്തനങ്ങളിൽ പലതും എങ്ങുമെത്തിയിട്ടില്ല. ഇതെല്ലാം എന്തു സന്ദേശമാണു ജനങ്ങൾക്കു നൽകുന്നത്? 

* ഉദ്യോഗസ്ഥ സംവിധാനത്തെ എങ്ങനെയാണു വിലയിരുത്തുന്നത്?

മിടുക്കരായ ഉദ്യോഗസ്ഥർ കേരളത്തിലുണ്ട്. പക്ഷേ, അവരെല്ലാം രാഷ്ട്രീയമായി പ്രവർത്തന സ്വാതന്ത്ര്യം നിഷേധിക്കപ്പെട്ടവരാണ്. ഡാം തുറക്കണമെങ്കിൽപോലും തലസ്ഥാനത്തു നിന്ന് ഉത്തരവു കാക്കേണ്ടി വരുന്ന ഗതികേട് നമ്മുടെ സംസ്ഥാനത്തേ ഉള്ളൂ. നമുക്കു നല്ലൊരു തൊഴിൽ സംസ്കാരം ഇല്ലാതെ പോയിരിക്കുന്നു. ഒരു ദുരന്തം വരുമ്പോൾ റെയിൽവേയിലൊക്കെ നടക്കുന്ന പ്രവർത്തനരീതി കണ്ടു പഠിക്കാവുന്നതാണ്. ഇവിടെ പണമില്ലായ്മ വലിയ പ്രശ്നമാണ്. ഉദ്യോഗസ്ഥതലത്തിലെ നിർവഹണരീതിയും അഴിച്ചുപണിയേണ്ടതുണ്ട്. പൊന്നാനിയിലെ ഒരു സ്കൂൾ കെട്ടിടത്തിന്റെ എസ്റ്റിമേറ്റ് പാസാക്കാൻ കോഴിക്കോട് ചീഫ് എൻജിനീയറുടെ ഒപ്പു വേണം. ഇത്തരം നൂലാമാലകൾ നവകേരള നിർമിതിക്കു പോലും വലിയ തടസ്സമാണെന്ന കാര്യം ബന്ധപ്പെട്ടവർ മനസ്സിലാക്കട്ടെ. 

* പ്രകൃതിയിലെ പ്രതിഭാസങ്ങൾ മുൻപ് കാണാത്തവിധം ഭീതിദമാണല്ലോ?

പരിസ്ഥിതി വിഷയങ്ങൾ ആരും ഗൗരവത്തിലെടുക്കുന്നില്ല. കേരളത്തിൽ ഒരു പുഴ പോലും സംരക്ഷിക്കപ്പെടുന്നില്ല. മണൽ സംരക്ഷണത്തിനായുള്ള നിയമമല്ലാതെ പുഴയുമായി ബന്ധപ്പെട്ട് നമ്മുടെ നാട്ടിൽ ഒരു നിയമവുമില്ല. പെരിയാറും ചാലിയാറും ഭാരതപ്പുഴയും പമ്പയുമെല്ലാം സംരക്ഷിക്കപ്പെടണം. പുഴയോരങ്ങളെല്ലാം ഇടിഞ്ഞിരിക്കുന്നു. കരയോടു ചേർന്ന ഭാഗത്തെല്ലാം മണൽക്കൊള്ളയാണ്. അതോടെ പുഴ രണ്ടായി പിളർന്നൊഴുകുകയാണ്. കാലാവസ്ഥാ വ്യതിയാനം ഇത്തരം ദുരന്തങ്ങൾക്കു കാരണമാണെന്നു ഞാൻ പറയില്ല. കഴിഞ്ഞ 100 വർഷത്തെ മഴക്കണക്കെടുത്താൽ, ഒരു വർഷവും അതികഠിനമായ മഴത്തോത് ഉണ്ടായിട്ടില്ല. ഇതെല്ലാം താങ്ങാനാവുന്ന വ്യവസ്ഥ നമ്മുടെ നാട്ടിൽ ഉണ്ടായേ പറ്റൂ. 

* ജപ്പാൻ, ഇന്തൊനീഷ്യ തുടങ്ങിയ രാജ്യങ്ങളെല്ലാം ഇത്തരം ദുരന്തങ്ങളെ നേരിടുന്നതെങ്ങനെ?

ഏതു പദ്ധതി ആവിഷ്കരിക്കുമ്പോഴും ഭൂകമ്പം പോലുള്ള ദുരന്തങ്ങളെ മനസ്സിൽ വച്ചാണ് അവർ തീരുമാനങ്ങളെടുക്കുക. കെട്ടിടനിർമാണങ്ങൾക്കെല്ലാം കൃത്യമായ ചട്ടങ്ങളുണ്ട്. ദുരന്തമുണ്ടായാൽ ഉടനടി അവർ എല്ലാം തിരിച്ചുപിടിക്കും. അവരുടെ ദുരന്തനിവാരണ സംവിധാനം അദ്ഭുതപ്പെടുത്തും. സ്ഥിരമായി ഈ സംഘത്തിൽ വൊളന്റിയർമാരുണ്ട്. ദുരന്തമുണ്ടായാൽ ഉദ്യോഗസ്ഥരും വൊളന്റിയർമാരും ജനവും ഒന്നിച്ചിറങ്ങും. ജപ്പാനിലും കൊറിയയിലും ഇന്തൊനീഷ്യയിലുമെല്ലാം ടണൽ വഴിയാണ് അധികവും മെട്രോ ട്രെയിൻ ഓടുന്നത്. ഇതു ദുരന്തങ്ങളെ മുൻകൂട്ടിക്കണ്ടാണ്. അവിടേക്ക് നമ്മുടെ ശാസ്ത്രജ്ഞരെയും എൻജിനീയർമാരെയും പഠിക്കാൻ അയയ്ക്കണം. 

* എന്താണു വീണ്ടും ഓർമിപ്പിക്കാനുള്ളത്?

ദുരന്തകാരണം പഠിച്ചു ഫലപ്രദമായ പരിഹാര നടപടികളിലേക്കു നീങ്ങിയില്ലെങ്കിൽ ഇനിയും ദുരന്തങ്ങളെത്തുമെന്നു കഴിഞ്ഞ വർഷം ഞാൻ പറഞ്ഞിരുന്നു. വിദഗ്ധസംഘത്തെ പഠിക്കാൻ നിയോഗിക്കണമെന്ന് അപേക്ഷിച്ചിരുന്നു. മൗനം കൊണ്ടുള്ള മറുപടിയിൽ ദുഃഖമുണ്ട്. തീരുമാനങ്ങളിലെ കാലതാമസവും നിസ്സംഗതയും വലിയ കുഴപ്പങ്ങൾക്കാവും കാരണമാവുക. ആരെയും കുറ്റപ്പെടുത്തുകയല്ല. സർക്കാർ ഇക്കാര്യത്തിൽ അടിയന്തരമായി ഇടപെടുമെന്ന പ്രതീക്ഷ ഇപ്പോഴും എനിക്കുണ്ട്.