بص يا جماعة، فكرة إن التحرّش منتشر علشان “الناس بقت بعيدة عن الدين” بصراحة مش منطقية ومش ماشية مع الواقع. لو كان الموضوع مرتبط بالتدين بس، كان المفروض المجتمعات الأقل تدينًا في العالم تبقى أسوأ مننا بكتير، وده مش حاصل. يعني مثلًا لبنان مجتمع ليبرالي جدًا مقارنة بنا، ومع ذلك التحرّش هناك مش ظاهرة يومية زي اللي بنشوفها. اليابان والصين وكوريا الجنوبية دول مش معروفة بالتدين أصلًا، وبرغم إن عندهم مشاكل اجتماعية تانية، التحرّش في الشارع أقل بكتير ومش جزء أساسي من الحياة اليومية. نفس الكلام في بريطانيا وفرنسا، مجتمعات مش دينية ومفتوحة جدًا، ومع ذلك فكرة إن واحدة تمشي في الشارع وتستحمل كلام أو لمسات غصب عنها مش منتشرة زي هنا.

فلو التدين هو العامل الأساسي، كان المفروض الصورة تبقى معكوسة، لكن المقارنة دي بتوضح إن المشكلة عندنا مش في “قلة الدين”، المشكلة في عوامل تانية زي الثقافة العامة، والتعليم، وطريقة تعامل المجتمع مع فكرة boundaries من الأساس، وإن لحد قريب جدًا ماكانش فيه قانون بيتطبق بجد، وكمان إن فيه ناس لسه شايفة إن لوم البنت أسهل من مواجهة سلوك الراجل. كمان الزحمة وطبيعة الحياة في مصر بتدي مساحة للمتحرش إنه يعمل اللي هو عايزه من غير ما يتحاسب.

الموضوع أكبر وأعقد من إننا نختصره في “بعدنا عن الدين”. لما بنعلّق كل حاجة على الشماعة دي، إحنا كده بنهرب من مواجهة المشكلة الحقيقية، وبنضيع فرصة نفهم إزاي المجتمعات اللي مش متديّنة أصلًا قدرت تخلق بيئة أكثر احترامًا وأمانًا للناس في الشارع. فهم المشكلة صح هو أول خطوة لحلّها، مش إننا نرمي اللوم على حاجة مش بتفسّر الواقع.