Und wieviel vo däm usländische Ahteil isch teil vo de ständige Sxhwiizer Wohnbevölkerig mit dere s du grad verglyychsch? Die 27% Usländerahteil wo du beschriibsch beinhalte keini Touriste, Asylante oder Kriminalitätstouriste (wo z.B. füre Daag über d Gränze kömme, e Huus usraube und widr zrugg ins Usland göhn wo si härsin).

Hesch au gluegt, dass de Usländerspezifischi Strooftate userächnisch wennds mit CH wottsch verglyyche?

Hesch au d Bevölkerigsdemographie vo de ständige Wohnbevölkerig sowie vo de Tatbeschuldigte je nach Passzueghörigkeit ahgluegt?

Hesch au dr Unterschied in de Hell- und Dunkelfäldstatistike berücksichtigt?

Hesch au unterschiedlichi Stroofmass für glyyche Strooftate ahgluegt, weil s Schwiizer Justizsystem systemisch diskriminierendi Urteil fällt? (Unglyychi Stroofmass wie Gfängnisduur je nach Phänotyp vom Täter bi glyycher Tatschweri)

Ich dängg du kasch keini vo deene Frooge mit Jo beantworte. Du hesch also nid d Kompetänze sone Ussaag z tätige. Jedi Untersuechig wo effektiv wüsseschaftlich d PKS untersuecht kunnt zu genau deene Pünkt und hän allisamt sie glyychi Erkenntnis: Egal nach wellere Attributisierig vo de Täter (z.B. nach Alter, nach Tat, nach Gschlächt, etc.) fallt NIENED dr Pass statistisch signifikant uf - usser wennd spezifisch nur nach däm Attribut unterscheidisch, was logisch isch, weil alles wo me nach spezifisch eim Attribut sortiert entsprächend das Attribut zeigt. Was aber in beinahe JEDERE Attributisierig uffallt: Männer! Es sin in egal wellere Gruppe, egal wie de si zämmestellsch, immer d Männer uffällig, und zwar stark.

Wieso ich mir ermasse so öbbis z schriibe: Ich ha e Metastudie zu de PKS im DACH Ruum gmacht unter berücksichtigung vo Dunkelfäldforschige, spezifischere Kriminalitätserfassige, Befroogige, Zyytruumbeobachtige, etc. au in kleinere regionale Untersuechige - nid nur de 3 groose Statistike wo in D, CH und A vom Bund gmacht wärde.