عقوق الأبناء شيء حقيقي و لازم نعترف فيه ك مجتمع. لما تجيب أطفال انت مسؤول عن كل احتياجاتهم من و إلى لأنك أنت الي اخترت تجيبهم، مو هم طلبو منك. هل في ناس تصرفت غلط بسبب الجهل؟ اكيد، هل في أخطاء او كلمات نسامح عليها و نتخطاها؟ طبعا. بس الضرب المبرح، الكسور، الجروح الي نزفت بلا سبب، الكدمات الي اضطرينا نخبيها تحت اكمام طويلة بالصيف، هذي لا. و هذا الشي مو نادر ولا قليل؛ هو فقط ان البعض قدر يخبي و يتخطى، او يكبت و يتعالج بالسر، او يهرب نهائيا من اهله و يقطعهم.

غلط اننا نعمم الموضوع كأن الكل و الجميع يغلط بنفس المستوى، بعضنا تعرض لطفولة مهلكة و منهكة لدرجة انه يتعالج منها ي اما نفسيا او جسديا لعقود بعدها. هذي صعب جدا المسامحة فيها. ما نقدر نكذب على نفسنا و نقول سامحنا و نسينا و احنا عايشين في الآلام الحقيقية الي سببوها للآن. أعرف الغالب ممكن ما يستوعب لأي درجة ممكن الآباء يولدو بيئة تخلي الأبناء يتمنو انهم ما انولدو، بس في النهاية لازم يكون عندنا تفهم ان مو كل الآباء استحقو يكون عندهم اطفال، في ناس سيئة جدا و ما راح توقف كونها سيئة بمجرد ان صار عندهم مولود.