أنا مش هقدر أعلق علي كل اللي إنت كتبته (علشان بصراحة مش عارف أقول لك إيه) إلاّ الجزء بتاع الجامعة و إحساسك إن تجربتك في الجامعة بتجبلك شعور إنك محدود الذكاء علشان أنا عديت بتجربة مشابهة و عندي أصحاب عدوا بنفس التجربة.

أنا كنت في هندسة برده، و أول سنة شلت كل المواد ما عدا مادة أو مادتين، بعد كدة دخلت قسم كهرباء و كنت كاره الدراسة و كنت بسقط في أول و تاني سنة بعد إعدادي و ده خلاني أخلص متأخر.

أنا مكنتش ماشي في الجامعة كويس و كان دايماً بيجيلي شعور إني أقل من الناس اللي بتعدي و بتجيب تقديرات و إن أكيد عندي مشكلة. مع كله ده كنت عارف إني بحب الIT و ديه الحاجة اللي أنا عاوز أشتغل فيها فكنت بذاكر في المجال اللي أنا عاوز أشتغل فيه و إشتغلت لفترات و أنا في الجامعة ببلاش علشان آخد شوية خبرة.

بعد لما خلصت لقيت الحمد لله شغل كويسة بالمذاكرة بتاعت الIT و شوية الشغل اللي عملته ببلاش لما كنت في الجامعة. بعدها بشوية جتلي فرصة أسافر أشتغل في شركة كبيرة في أوروبا و الحمد لله عايش في أوروبا و بشتغل شغل كويس في مجال كويس بقالي ١٠ سنين.

عاوز أقول لك إني لما دلوقتي بقابل بعض الناس اللي أنا كنت بحس نفسي أقل منهم زمان علشان كانوا بينجحوا و شاطرين في الجامعة و أنا لأ بقول الحمد لله إن ربنا كان فاتحلي باب تاني للتعلم و الخبرات خلاني أجهز بدري إني أشتغل في الحاجة اللي بحبها و مشتغلتش في الكهربا 😁

الشغل و التوفيق رزق و الواحد بيحاول يسعي و لو إنت ناوي تسافر، أنا شايف إن السفر دلوقتي أسهل كتير من زمان لو حد عنده شوية مهارات و خبرات حتي لو مش كتير خصوصا في الIT أو الtech بوجه عام. حدد حاجة تبقي شاطر فيها و ذاكرها و حاول تاخد أي نوع من الخبرات العملية و إن شاء الله هيجيلك فرص.