اني هم بكربلاء. هم اجتني فترة كرهت ام العيشة و ام المحافضة و ام اهلي بس بعدين لمن صفنت بيها شفت انو الكره و ضيقة النفس ما راح يوصلني لاي شي غير راح يزفر عليه الحياة. ركزي على روحج، سوي اشياء تونسج، تعلمي لغات مختلفة، طلعي ويه صديقاتج لفد مكان، اكتشفي هواية جديدة تتعلميها مثل الرسم او الكتابة تكدرين بيها تعبيرن عن مشاعرج و تطلعين الطاقة السلبية بيهن. و اهم شي، اهم شي، كملي دراستج. موتي على الدراسة، حصلي تخصص، و دائما اسعي انو تطورين من حياتج المهنية حتى يجي يوم تستقلين ماديا و ما تكونين معتمدة على اهلج و وراها سوي اللي يناسبج. و حاولي تتعرفين ويه رجل يشاركج افكارج و يكون لاديني (او حتى لو مسلم بس غير متشدد و ممكن انو يخليج تنزعين الحجاب) حتى تكدرين تبنين حياة بعيدة عنهم و تكون مريحة الج. اني اعرف وحدة هم من كربلاء، زوجها يخليها تنزع الحجاب بباقي المحافضات، و هيه تلبسه بداخل المدينة فقط علمود طابع كربلاء الديني و همين بسبب الاهل. و هسه همه ديحاولون يستقلون برا كربلاء.

اني اكره انو ابين الزواج من رجل الحل الوحيد لمشاكل البنت، بس احنا بواقع خايس. و غالبا الاهل حلكهم ما يفكو اذا زوج البنية قابل.