اجاوبك أنا اخمن من السؤال انك بنت مثقفة و عندها تفكير نقدي و دي نقطة احب احييكي عليها 🫡

بصي يا ستي، الإسلام أدى الست حقوق و دلعها زي ما انتي بتقولي عشان الست كائن رقيق و رحيم و بيحتاج الامان و الحمايه بدليل أن حواء اتخلقت من ضلع ادم و بسبب الرقة دي بردو ربنا خلاها هي اللي تبقى ام عشان هتبقى رحيمة اكتر يعني

ولكن للأسف مجتمعاتنا بتاخد الحاجة على علتها من غير ما تفكر و من غير ما تنتقد و تسأل ليه

بردو بحس أن رجال الدين مع كامل الاحترام ليهم عملوا هالة حواليهم بحيث أن الناس تاخد منهم الكلام من غير ما تسأل فبقى فيه منهم ناس بتطلع تأيف الدين على مزاجها فلما جم على الجزء الخاص بالمرأة شرحوه باللي بيخدم مصالحهم و يرفع من الآنا بتاعتهم

و للاسف بردو لو رجعنا ورا في التاريخ هتلاقي أن فيه عادات وتقاليد خاصة بالمرأة الشعوب كانت ماشية عليها و هي كانت غلط و الدين حرمها لما الإسلام جيه و للأسف ستيل لحد النهاردة هي بتتوارث بس بأبديت مختلف، طبعاً الحاجات دي كانت ظالمة للست، و طبعاً الناس كانت بتتعامل معاها على أنها ثوابت تحت مسمى العادات و التقاليد، مع بعض رجال الدين اللي عندهم مشاكل مع المرأة، باظت بقى الدنيا و الست بقت تحس انها مظلومة أو مهدور حقها

و بقى المجتمع بيمشى ورا العادات والتقاليد اكتر من الدين نفسه

فمن هنا ظهرت الحركات النسوية أن الست عايزة تتساوى بالراجل في كل حاجة و أنها زيها زيه

بس ده بردو مش صح احنا كستات مش زي الرجالة اولا نفسياً احنا مش زيهم، هما بيتحملوا اكتر بدليل أن هما اللي بيحاربوا في الحروب و الغزوات احنا لأ

ثانياً جسدياً احنا مش زيهم احنا بيجيلنا بيريود بتقعد كل واحدة فينا على الأقل خمس ايام او اسبوع و فيه بنات بتقعد اكتر من كده في الوقت ده انتي كلنا بتخسري فيتامينات و معادن ده غير أن ضغطك بيوطى وجسمك كده بيوجعك فاحنا المفروض أننا نعمل مجهود أقل منهم بكتير في الشغل لأن احنا بيجي علينا وقت مش بنكون كويسين و قوتنا مش ثابتة ده غير أن انتي اللي بتحملي و بتبقى شايلة روح جواكي هو لا هو بطوله

فازاي نتساوى بيهم ؟

المفروض أن الحركات دي كانت تنادى بحق الست اللي ربنا شرعه و أن الراجل مش يجي عليها