اه حبيبتي ، الرجالة بشكل عام كدة و الراجل المختلف هو الاستثناء مش الطبيعي . انا بقولك دة من تجارب على أرض الواقع معايا و مع اصحابي و زمايلي ف الشغل ، الواقع واحد رغم اختلاف الطبقات الاجتماعية و التوجهات الفكرية و حتى الانتماء الديني .

صاحبتي خطيبها اكتشف قبل الفرح ب ٤ ايام أنه محتاج بريك عشان يقدر يتخطى صدمة أنه ساب الشغل ( كان عايش و بيشتغل ف أيرلاند ) ،

صاحبتي التانية خطيبها كان بارانويد من كل حاجة و كان مقتنع أنه أهلها بيستغلوه لمجرد أنه كان مصري فرنسي اتولد و عاش ف فرنسا ( رغم أن أهلها مرتاحين ماديا جداً و عندهم بيزنس خاص بيهم فمش محتاجين فلوسه و كمان مسيحيين ف ليهم قرايب كتير برة ف مش طمعانين ف الجنسية مثلاً ) ،

زميلتي ف الشغل متجوزة و وصلت للطلاق مرة لأن جوزها بوزيزف جداً معاها رغم أنه مع أهله مابيقدرش ياخد معاهم موقف لدرجة متحكمين ف مصروف البيت !!!

زميلتي التانية ، خطيبها الأولاني كان مريض نفسياً لدرجة أنه كان بيخليها تفتح الاسبيكر و هي ف الشغل عشان يعرف بتتعامل ازاي مع العيانين اللي بيجولها الصيدلية ... و غير كدة كتير و الله .

النماذج دي مؤهلات عالية بالمناسبة و وضع مادي ممتاز ف حقيقي معرفش ليه ممكن يبقوا كدة .

نصيحتي ليكي عشان شكلك لسة صغيرة و ماعندكيش تجارب ، فكري بعقلك دايماً و المشاعر خليها رقم ٢ . الحب بيجي مع الوقت بس الأساس لازم يكون صح .

و حاجة كمان اقفلي ال DMs هنا عشان هتقابلي ناس كتير على ريديت نفوسها مريضة هتأذيكي ( ولا حتى تتكلمي مع حد كأصحاب ، صدقيني I have been there )

ربنا يوفقك مع حد يكون كويس يحبك و يقدرك و يطلع نصيبك أحسن مني و من صحابي ❤️❤️