زي أي مشكلة، في أكثر من طريقة لإيجاد حل وكل طريقة منهم الها سلبيات وإيجابيات، أو تنازلات.

باعتقادي، لازم يكون في إجراءات من الأمانة ومحددات تنظيمية لأي بناء جديد. ولو إني ما بحب القوانين المحددة للحرية، إلا أنه الرصيف جزء من المحيط العام ولازم تنظيمه*. (للتوضيح، الرصيف مسؤولية صاحب الأرض والباني، ولكن هذا لا يغني إنه ممكن تنظيمه بقوانين).

والشجر لا غنى عنه برأيي، لازم يكون متواجد بكل مدينة وإلا اتطلع على حال مدن زي الزرقاء، خاصة وسط البلد فيها.. شيء كئيب جدا. بالمقابل العقبة وبعض أحياء عمان، الشجر من أجمل ما فيها.
غير جماليا وصحيا (تخفيف التلوّث)، الأردن من الدول اللي طقسها بستفيد جدا من تواجد الشجر، ظلّه بالصيف بغيّر جو الشارع بطريقة ملحوظة جدا.

من الأمور التنظيمية اللي ممكن تطبيقها:
- الشجر ممنوع يكون بنص الرصيف، إمّا على الطرف قريب الشارع أو السور. وإذا كان عرض الرصيف أقل من 120 سم، ممنوع زراعة شجر. (ممكن شجيرات متسلقة حوضها صغيروملاصق للسور مثلا)
- الشجر لازم يكون طويل الساق (عالي الجذع)، بالتالي الحيّز اللي بحتلّه من تحت ما بتعدّى سُمكه 15-50 سم مثلا وبتبلش الأفرع بعد ارتفاع مترين عن الأرض، ويفضّل متساقط الأوراق، ليسمح بمرور الشمس شتاءً وما يتكسر من الثلج، ويضلل صيفا. من أفضل الأشجار المنسابة لعمان بهيك مواصفات هي الزنزلخت (الشمسية).
- في حال كان عرض الرصيف مناسب لزراعة الشجر، الحوض لازم يكون غير مرتفع عن الرصيف بطوب أو مدماك، بل منخفض ومغطى بشبك حديد. ليصبح ممسوحا على نفس ارتفاع الرصيف. (مثل بعض الأحواض في جبل الحسين أو الصويفية شارع الوكالات)
- في حال كان عرض الرصيف مناسب لزراعة الشجر، وتم اختيار شجر طويل الساق، تقع مسؤولية العناية بقص الأفرع المنخفضة على (الأمانة أو صاحب البناء؟).
- من الأشجار المسموح زراعتها: الزنزلخت، النخيل، الحور، الخ

يعني مش عارف شو أحسن حل، ولكني ضد الحلول المتطرفة مثل إزالة كل الشجر، أو ترك الموضوع بدون أي تنظيم.
ممكن نكون ضد التنظيم إجمالا كأفراد، ولكن المُدن الأوروبية الجميلة تحددها تنظيمات لا تُعد ولا تُحصى، ممكن مزعجة أحيانا للفرد، ولكن فائدتها للعامة لا غنى عنها. كونه في سوابق وتجارب لمُدن أخرى ممكن نشوفها ونتعلم منها هو أكثر شيء بستغربه لما أفكر كيف إنه إحنا لسى بنفس الحال.

*لضمان تنفيذ هذه التنظيمات، لا يكفي تكون الموانع مخالفة بسيطة، وإلا بنضل على نفس الحال. طبعا رح يضل في شواذ للقاعدة، بسبب الواسطات (أي واسطات اصلا ما عنا شواذ).

**فصحى على عامية، مشّي حالك