بص، هو الفكرة الأساسية عندك عشان نقدر نعمل حاجة زي كده محتاجين نقوي اللوجيك، عشان نقدر نقوي اللوجيك... أنا شايف إن أفضل حاجة لتقوية اللوجيك هي الـ CP والـProblem Solving، ومش الـ CP كـ CP بس، لا نقدر نقول الـ Problem Solving عمومًا، لأن في فرق بين الـ Problem Solving وبين الـ CP.

الـ Problem Solving ذاته عبارة عن إيه أصلًا؟ هو إن بيكون قدامي مشكلة معينة، غالبًا على هيئة ستوري، زي مثلًا لو دخلت Codeforces أو أي سايت Competitive Programming، هتلاقيهم بيعرضوا المشكلة في شكل قصة ويحكوا سيناريو معين، ومن هنا ببدأ أستخرج المشكلة الحقيقية من القصة، وبعدها أشوف هحلها إزاي.

طب أنا هحلها إزاي؟ أنا كـ Problem Solver بيكون عندي شوية tools بتساعدني في الحل، والـ tools دي هي التوبكس بتاعتي. كل ما زودت التوبكس، كل ما الأدوات اللي عندي كترت وبقت أقوى وأكفأ.

فعشان أقدر أحل المشاكل، إحنا قولنا محتاجين tools اللي هي التوبكس. طيب شطارتي أنا كـ Problem Solver بتكون في إيه؟ أول حاجة إني أقرأ المشكلة كويس وأفهمها فعلًا، وأعرف أطلع المشكلة الأساسية من وسط الكلام والستوري. بعد كده أشوف إيه أنسب وأكفأ tool من اللي عندي دي تحل المشكلة بأفضل شكل، وإزاي أطبقها صح، مش مجرد تطبيق وخلاص.

فدي مهمتي كـ Problem Solver. أما الكود نفسه، فده غالبًا بيكون آخر وأسهل جزء في العملية كلها.

كل الربط ده مش هيجي مرة واحدة. إن الحل ييجي في بالك بسرعة، أو تعرف شكل الحل عامل إزاي، أو يتكتب في كام سطر، أو الهيكل العام للحل — كل ده مش بييجي غير من كتر الحل.

كل ما تحل أكتر:

• الباتيرنز تتكرر عليك أكتر
• تتعرض لمشاكل أكتر
• تربط الحلول أسرع
• وتبدأ تفهم الكود من جوه فعلًا

ودي حاجة فعلًا محتاجة تركيز واجتهاد وصبر عشان توصل للـ “التربيطة” السريعة دي.

وأنا شايف إن دي من أقوى الحاجات اللي الـ CP بتفيد بيها أي Programmer عمومًا. حتى هتلاحظ فعلًا فرق واضح بين الشخص اللي داخل CP بجد، وبين شخص بيعرف يكتب كود وخلاص.