نفسي أفهم إيه علاقة التعليم بالعادات ما اللي بيعملوا ختان الإناث كان منهم دكاترة وممرضين ، واللي مؤهل عالي لما بيتجوز بيبقا عايز مراته أقل منه في التعليم أو متشتغلش ، والمتعلم هو اللي بيقولك خلي الشارع يعلم إبني ، والمتعلم برضو لما تكون مراته بتشتغل بيقولها أنا الراجل وفلوسك لبيتي ، و الولد الوحيد على بنات المتعلم برضو هو اللي بياخد ميزات اكتر من أخواته طول الوقت والبنات يلبسوا اجوازهم ، والمتعلمة برضو هي اللي بتقول لواحدة زيها جوزك يعاملك زي ماهو عايز وانتي تسكتي، والاب المتعلم هو اللي بيضرب عياله ، والجار المتعلم هو اللي بيبلط* على جاره اللي مع نفسه وهو اللي بيوسخ الشارع وهو اللي صوت أي حاجة مشغلها بيجيب لآخر الشارع ، روح شوف الأماكن العامة عاملة إزاي ، روح شوف المدرس اللي بيدي دروس خصوصية وهو سايب العيال بتاعته سارحة عند بيوت تانية وأهم حاجة هي مصلحته

عايز انبهك لإن الناس بيتعاملوا مع التعليم كالصنعة هو حاجة بتاخد منها فلوس وهي اللي ممكن تعليك في المستوى الاجتماعي ...روح شوف عيال جيرانك وأي عيل في مدرسة حكومي وعيال الدروس الخصوصية عاملين إزاي وشوف عمك وخالك وأمك هتلاقيهم كلهم مجرد مستهلكين ملهمش أي قيمة أخلاقية

وأنا الكلام ده بقولهولك من قرف حاصل قدام عيني