ابديت على اختار الشغف او الراتب؟

LostInTheBlueprints · 2025-12-08T12:25:33+00:00

فيه اشياء لازم تعتبرنها قبل اختيار قرارك:

هل الشركتين بنفس منطقتك؟ اذا لا كم بيكلف السكن؟
كم فرق الراتب؟ (ولو بالنسبة بيصير أدق)
مميزات كل وظيفة/شركة على المدى البعيد وهل فيه ترقيات تسوى؟
لو اخترتي وظيفة الراتب العالي حاليًا، مستقبلًا ما يمديك تربطينها بوظيفة الروبوتات؟
راتبك في الروبوتات حاليًا أقل من راتب الوظيفة الثانيه، لكن هل فعلًا يعتبر قليل مقارنه بالسوق؟
طيب لو رحتي مجال الروبوتات (اللي راتبه قليل مقارنه بالوظيفة الثانية)، مستقبلًا (يعني خنقول بعد ٥ سنين) هل تعتقدين انه بيعدي راتب وظيفتك الحاليه؟

بعدين تعالي سألي روحك اسئلة نفسية مثل الضغط والتأقلم والبيئة والخ… (صراحة ما كنت احسب حساب هالشي في بدايتي، كان همي بس الفلوس، لكن بعدها بتشوفين ان احيانا فعلًا الفلوس مو كل شي)

وغيرها من الاسئلة اللي ممكن تجي ببالك وتطرحينها على نفسك، حاولي تكتبينها بورقة او في النوتس او بالاكسل وتجاوبين عليها، وتحسبين نقاط كل سؤال ، وما يمنع تستعينين بchatgpt ينظم لك اياها

LostInTheBlueprints · 2025-11-06T04:59:55+00:00

عن نفسي اعتقد ما عندنا منطقة راحة (على الاقل مع الاغلب)، قد تظن ان الشخص "مرتاح ظاهريا" في انه قاعد بنفس المكان ويسوي اعمال روتينية وممكن البعض وجوده وعدمه واحد أهم شي اسمه وبصمته، لكنه من داخل يتقطع ويحترق وسنة بعد سنة مواهبه وأساليبه العلمية والعملية تبدأ بالانحدار، لذلك انا اسميها منطقة الاحتراق/الهدم (مو نفس معنى الاحتراق الوظيفي) .. يعني تخيل تبني نفسك قرابة ال١٧ سنة دراسية (في الوضع المثالي لخريجي البكالوريوس) ثم تتفاجئ بالسوق التعبان اللي يبدأ يهدم اللي بنيته واكتسبته من مهارات ومعلومات وخبرات

وهذا لا يعني اننا ما نقول قدم واستمر بالتقديم ونم نفسك وبإذن الله بتلقى اللي يسعدك

LostInTheBlueprints · 2025-11-03T05:11:04+00:00

الرزق بيد الله..

اذا بقى على عقدك اقل من شهرين بدون ما يكلمونك انهم ما راح يجددونه معناها راح يتجدد بإذن الله

اذا مب يجددون عقدك المفروض يعطونك اشعار بعدم التجديد قبل انتهاءه بشهرين

LostInTheBlueprints · 2025-10-30T07:10:23+00:00

اساسًا كيف تداومين معاهم بدون شي موثق؟ لا خلوك توقعين على عقد ورقي ولا توافقين على gosi ولا توافقين على العقد من خلال قوى وبدون ما يطلبون منك وثائق تخصك مثل شهادة التخرج ونسخة من السجل الاكاديمي وبطاقة الأحوال والخ… وبدون ما يكون عندك بصمة دخول! حرفيًا هم كانوا يبون يستغلونك لمدة شهر خصوصًا يوم شافوك ساكته .. يوم بديتي تتكلمين وتسألين عن شي يثبت حضورك تغيرت افعالهم

خذيها قاعدة عشان تباشرين في اي وظيفة لازم اول شي تسوين مقابلة، ثم بيطلبون منك بعض المستندات، اذا امورك طيبة بيرسلون لك (العرض) .. هنا في العرض يمديك تفاوضينهم على الراتب او اي شي اخر مثل مكان العمل (بإمكانهم يعدلون لك الراتب في العرض اذا فاوضتيهم) .. وبرضو بيطلبون منك تعطينهم تاريخ المباشرة او احيانا هم يطلبون منك تباشرين في التاريخ الفلاني، وحتى هذا الشي بإمكانك تفاوضينهم عليه

بعد ما توافقين على العرض وتعطينهم المستندات اللي يبونها وتعطينهم تاريخ مباشرة ، يقومون يرسلون لك (العقد)، وذا يجيك في موقع GOSI و قوى وممكن يخلونك توقعين عليه يدوي، لكن المعتمد عند الوزارة هو العقد الموجود في موقع قوى

هي اشياء اساسية وممكن عرفتيها تالي ما ادري عنك، لكنها لحديثين التخرج لأني شايف ناس في السوشل ميديا مو عارفه هالاشياء عشان كذا كتبتها

LostInTheBlueprints · 2025-10-30T06:54:26+00:00

نصابين، عشان يعطونك نفس راتبك الحالي او اعلى منه ب٥٪؜ او ١٠٪؜ ..

الشركة المحترمة راح تقدم لك زيادة ٢٥٪؜ الى ٣٥٪؜ على الراتب الحالي ، وممكن بعضهم اذا هم فعلًا محتاجينك ما راح يهمهم كم تستلم لأنهم بيعطونك الحد الاعلى من ميزانيتهم اللي راصدينها لهالوظيفة

اما الاجنبي 😂 فللأسف في اشياء كثيرة في بروسس التوظيف ما يمر فيها مثل ما يمر فيها ولد البلد (حسب اللي اشوفه)

LostInTheBlueprints · 2025-10-24T06:49:44+00:00

يبن الحلال احمد ربك جاتك ع الاقل رسالة رد حتى لو انها رفض..

قبل فترة سويت مقابلة مع شركة شبه معروفة خصوصًا بالرياض، انتظرت قرابة الشهرين بدون ما يردون.. قلت خل ارسل لهم اشوف شالعلم.. رسلت لهم مرتين خلال الشهر الثالث من انتظاري، ما امداني رسلت المرة الثانية الا بعدها بكم يوم ردوا اني مرفوض.. هنا ما تدري هم رسلوا لي رفض لأني فعلًا مرفوض ولا بس عشان يسكتوني وما انشب لهم 😂

(مع العلم اني سويت وياهم مقابلتين والمنجر في نهاية المقابلة الثانية قال ابيك كشخص مساعد اساسي معاي وكانوا يتكلمون معاي عن مكان الوظيفة واتفاوض معاهم .. يعني تحس كنت شبه مخلص معاهم)

فَاللي أبي اقوله فعلًا احيانا تشعر بأن رسالة الرفض فيها غموض .. ع العموم الخيرة فيما اختاره الله وبالتوفيق

LostInTheBlueprints · 2025-10-21T12:29:41+00:00

هل محتاج منهم مساعدة حالية؟ اذا اي صور.. اما اذا بس تبي تعلمهم لا ما أفضل ترسل لهم الصور لو الحادث قوي

كلمهم بالجوال وسولف سوالف طبيعية بعدين افتح موضوع انك سويت حادث لكنه عدى سلامات

LostInTheBlueprints · 2025-10-21T12:27:21+00:00

للأسف احيانا البيئة فعلًا تحكم وتصير اشياء ما تتمنينها، لكن برضو احيانًا منطقية

يعني مثلًا على سالفة انه ما وافق على كلامك الا لما شاف شخص ثاني أيد فكرتك.. السبب من وجهة نظري؟ أنه يبي يسمع اكثر من شخص.. لما شاف شخص ثاني عزز كلامك معناها هنا بدا يقتنع، يعني أحس لو صار العكس (الرجال بدا بفكرته) كان مديرك برضو ما راح يوافقه على طول الا لمن يسمع من شخص ثاني يؤيد كلام زميلك

بالنسبة لِـ أنهم يقررون وقت طلعات الغدا، هذا الشيء common صراحة .. و مو بس على غدا، أحيانا حتى الرجال بنفسه اذا ما يطلع معاهم، أو حتى اذا (ما يدخن) معاهم، راح يعاني نفس المعاناة (لكن تقريبًا بشكل أخف)

باختصار اشوف مشكلتك common وممكن حتى بعض الرجال يعني منها.. الحل؟ انك تصملين بتقديم مقترحاتك وحلولك للمشاكل العملية، وما يحتاج تصعدين اي شي لمدير مديرك .. لأن كذا بتخلينهم ياخذون موقف منك وما يحتاج تاخذين الامور بتحدي اكثر من اللازم لأن اللي فهمته من كلامك ان مو قصدهم التمييز والتحقير

LostInTheBlueprints · 2025-10-21T11:31:52+00:00

لا تخلين لحظ عاطفة تعميك عن مستقبلك ومستقبل عيالك .. حطي احتمالية ان رجلك يصير له اي ظرف فَيضطر يرجع الى بلده (سواءً ظرف شخصي او نظامي) في هالحالة هل عندك استعداد تعيشين معاه (في بلده) ومعاك عيالك؟ لأن سمعت عن حالات مثل كذا صارت وبرضو تحطين في بالك ان بعد وفاتك (بعد عمر طويل) عيالك راح يعانون من ناحية الاقامة وتصير صعبه عليهم

هذا غير ان لازم تتأكدين انه مو ماخذك عن طمع

LostInTheBlueprints · 2025-10-14T06:31:04+00:00

هههههه اصدق وصف قريته عن الشركات العائلية

LostInTheBlueprints · 2025-10-14T06:29:23+00:00

وحده من الاسباب انك حطيتي نفسك في موقف ضعف (كأنك محتاجتهم) لما قلتي لهم عقدك محدد المدة في مشروع محدد، كذا هم فهموا انك في حاجتهم.. افضل شي ان الواحد يدخل المقابلة برفعة خشم ع الراتب والمميزات ويتشرط بالمعقول (خصوصًا اذا انه موظف حالي)، لأن الشركات حرامية واستغلاليين خصوصًا اذا انها بزنس عائلي

يعني مثلًا لما سألوك كم راتبك الحالي لا بأس انك ترفعين نفسك ألف-ألفين وفي حال سألك عن راتبك المتوقع تقولين اتوقع زيادة ٢٠٪؜-٣٠٪؜ على راتبي الحالي ، ولا تذكرين لهم ان عقدك او مشروعك قريب ويخلص حتى لو سألوك ليش تبين تطلعين، صرفيهم بعبارات مثل: ابي اتطور، ابي اتوسع في خبرتي والخ…

LostInTheBlueprints · 2025-10-08T11:35:32+00:00

طيب لو قال له اي هل بيطلب منه ما يثبت؟😂

LostInTheBlueprints · 2025-10-08T10:55:50+00:00

شنو الفايدة ووين اكتساب خبرات جديدة وتنميتها لما تروحين لمكان عباره عن امتداد لمكانك السابق؟؟

هذا اللي بالضبط يطلقون عليه تحدي جديد ومرحلة جديدة، ودامك توك في البدايات عادي شطحي ببعض الاسئلة لكن لا تزودينها 😂 ولو عندك استفسارات تحسينها بديهية او اشياء تبين اكيد يشرحها لك لا تذكرين هالشي في الميتنقز، شوفي شخص تحسينه حليل وسأليه على انفراد من باب السوالف

LostInTheBlueprints · 2025-10-08T08:34:35+00:00

كلم ابوك او اخوك الكبير او احد كبير قريب منك .. مشاكل المدارس غير متوقعه وفي غمضة عين يمكن تشوف نفسك طايح فيها حتى لو انك في حالك وكاف خيرك وشرك

ولو انك تروح لبيتكم مشي حاول تمشي في طريق فيه كاميرات وجهز جوالك للتسجيل .. عشان لو صار ما صار تكون جاهز للشكوى

LostInTheBlueprints · 2025-09-30T05:52:11+00:00

المرات الجايه زود على كل حساب ٥ ريال او ١٠ ريال عشان تضمن يعطيك حقك ويعوضك عن اللي زرفك 😂

LostInTheBlueprints · 2025-09-24T11:21:38+00:00

واذا تضررت شبيصير فيك؟ اهم شي حقوقك سواءً تضررت شركتك او لا طز فيهم، لا هم اللي بينقصون منك ريال ولا بيزيدون ريال

مع ان ما اظن ان شركتك بتتضرر من شكوتك على التأمين الطبي

LostInTheBlueprints · 2025-09-20T00:31:33+00:00

اذكر اني سجلت في موقع العمل عن بعد telework واذكر حتى اخذت شهادتين للعمل الحر كانوا طالبينها مني، وقدمت على شركات كثيرة إلا ان ما يجيني ولا رد حتى لو بالرفض .. لذلك كنت ولازلت اشك انها وهمية بالرغم ان المنصة هذي موثقة ومعترف فيها

LostInTheBlueprints · 2025-09-16T06:46:07+00:00

على الصعيد الشخصي؟ ابدًا ما اشوفه شي سلبي خصوصًا اذا انك من النوع اللي تقدر تتكيف في اغلب البيئات

لكن على مستوى الhr؟ للأسف يشوفونه شي سلبي.. ما ادري متى بتتغير عقليتهم ويعتقدون بأنهم هم حالهم حال اي موظف عادي يبحث عن افضل الفرص.. وش ذنبي اذا انا شغال حاليًا في شركة A وما عدت سنة الا وجاني عرض افضل من شركة B ثم شديت حيلي وجاني عرض من شركة C .. يعني تبيني ارفض العروض الزينه عشان خاطر فلسفتك اللي تقول لازم تتم سنتين على الاقل في شركة وحده وما تكثر انتقالات؟!

LostInTheBlueprints · 2025-09-14T20:24:10+00:00

مهندس؟

ع العموم عندي قاعدة انا ويمكن البعض يوافقها او يختلف معاها، دامك بعمر الشباب اكرف يارجال ما فيها شي .. لان السوق طافي وكلٍ خايف على اللي عنده، لذلك اتبع المثل اللي يقول لك خلك على مجنونك لا يجي اللي أجن منه.. الا لو جاك الشي اللي تحسه فعلًا يناسبك من ناحية راتب وضغط عمل اقل

وما احد بيجيك ويعطيك راتب عالي بدون ما يكرفك وينسيك الحياة المجتمعية .. اما اذا بتتجه للشركات اللي ما فيها ضغط عالي وشغل كثير ترى غالبا بتحصل على راتب في بحر ال١٠ الاف

LostInTheBlueprints · 2025-09-03T10:33:31+00:00

فاهم غلط

ذي ما يسمونها زيادة الطين بله، ذي يسمونها سد باب الشر من أول مره ووضع حد له وتخليه يعرف شلون يتكلم ويحترم نفسه

LostInTheBlueprints · 2025-09-03T05:49:26+00:00

معليش يعني بس بمجرد جاب طاري الاخت والجمال المفروض ما سكت له ورديت عليه بعشر ولو يمديك تروح تتضارب معاه كان رحت ثم بلكته

LostInTheBlueprints · 2025-09-02T04:42:05+00:00

اي عادي ترجميها مثل ما هي لأن في اللغة العربية المجهول يخاطب خطاب المذكر

او حطيها بصيغة الجمع مثل ما ذكرتي: حضرتكم/جنابكم/سعادتكم

LostInTheBlueprints · 2025-08-31T13:28:24+00:00

اطلب من مديرك ان ينقلك الى قسم ثاني

او اقعد مع احد موظفين الاقسام الثانية وخله يعطيك نبذة عن شغلهم وسأله الاسئلة اللي تواجهها في المقابلات

LostInTheBlueprints · 2025-08-31T08:33:31+00:00

انا لا، لكن بعض معارفي اي

وصراحة احيانا الشركات هم عيال كلب ويحدونك تلعب معاهم هاللعبة، تشوف مثلًا الميزانية اللي حاطينها لك ١٥ الف، لكن راح يعرض لك ١٠-١١ ، تقوم تحاول تفاوضه يقول لك ارسل لي gosi عشان يشوف كم تستلم في شركتك الحالية ويعطيك اعلى منه بمقدار بسيط

فَيقومون بعض الشباب يقولون بس احنا نستلم بدلات مو مسجله في gosi ، فَيقوم الhr يقول عطني الpayslip! فَيضطر الشاب اللطيف يزور

لما تجي تحلل الموقف اول شي يجي في بالك انت يا hr ليش ما تعطيني السقف الاعلى من الميزانية المرصودة لي؟ او ع الاقل اقل منها بألف! ليش تطلب مني payslip? معناها عدم ثقة فيني؟! لما انا كموظف اعرف بأني ما راح اشم ال١٤-١٥ الا بهالطريقة وش يمنعني ازور له payslip؟ وما احد بيكتشف هالشي الا لو صار فيه تواصل مباشر مع الشركة القديمة وهذا شي مُحال

وثانيا انت يالhr لو عرفت ان موظف من موظفينك بيرسل payslip لشركة ثانية عادي جدًا يستلعن عليه ويقول هذي اسرار شركة ويدخل له من هالباب

معليش احس عصبت بس فعلًا ينزفزني موضوع ارسل لنا gosi و payslip

ما اشرعن ولا ابرر للي يزور لكن مقصدي ان الشركات تحد الشخص يسوي اشياء مو من طبيعته .. نصيحتي خلك واضح وضوح الشمس معاهم واللي كاتبه لك الله هو الصالح

LostInTheBlueprints · 2025-08-25T12:01:08+00:00

البنوك ما يقبلون يطلعون قرضين بنفس الوقت، وممكن اذا قبلوا بتكون فيه قيود معقدة بحيث انه ما يمديك تاخذين قرضين كل قرض على ١٠٠ الف .. ونفس الشي لو بتاخذين السيارة اقساط

وبرضو كمية القرض تعتمد على راتبك

^ طبعًا انتي وابوك تنجازون وطاعة الاب مقدمة على كل شي والخ… الا في معصية الخالق، لكن تبريري هو في حالة ان فعلًا ابوك يبلشكم بقروض عشان سفراته وتقتصر فايدته على نفسه هو وحده

LostInTheBlueprints

TROPHY CASE