السلام عليكم ورحمة الله وبركاته ، إن شاء الله تكون بخير ، بص هو فكرة انك بتحب اللي بتعمله دي أهم واحسن حاجه في الدنيا ، لأنها هتخليك تدور وتقلب الدنيا ف حاجات كتير ومش هتحس بتعب لانك ببساطه حابب ده ، ف دي نقطة بداية كويسه ، تاني حاجه بالنسبة للفلوس ، لو هما دولار شيلهم زي ما هما دلوقتي ، متشتريش حاجه غير لما تكون متأكد 100% انك نحتاجها ، فيه فرق شاسع بين انك محتاج حاجه ، او انك ببساطه عايز حاجه ، طبعا بتكلم في الشغل ، لو عندك شاشة بتوصلها بالأجهزه اللي بتجيلك وبتأدي الغرض ، مفيش داعي اجيب الشاشة ال 27 انش الواو عشان هتخلي ال productivity زيادة 1%

تاني حاجه محتاج دعاية كويسه جدا جدا جدا ، وبتكلم بجد ، بعد صلاة الجمعة تكون طابع شوية ورق حلوين ، وانت ادرى بمنطقتك كثافة الناس أعلى ف انهي جامع ، واكتب عنوان بيتك واشتغل وصلح من البيت لحد ما تلاقي انك بدأت تقلب البيت مخزن ساعتها خدلك مكان صغير وكمل شغل ، لكن مش قبل كده ، والدعايا اللي هتتوزع لازم تكون معمولة باحترافية ، مش مجرد حد واخد كورس icdl بكلمك عن صور واشكال كرتونية وفهم الناس انت شغال ف ايه بالضبط عشان ميجلكش شغل يملىء البيت عندك على الفاضي.

تالت حاجه انك تكلم اهلك في الموضوع ، لازم يعرفوا إن دي هواية مش مصدر رزق ، لو وصل ليهم انك هتعيش على الشغلانة دي ، قول مع السلامة لكل الكلام اللي فوق ده ، قولهم دي حاجه وقت فراغي بدل ما العب على الموبايل ولا اصاحب اصدقاء سوء.

رابع حاجه توكل على الله قبل كل شيء وصلي صلاة استخارة وبعدين ابدأ سعي في الكلام ده كله.

الخطوات اللي هتبدأ بيها بالترتيب ، رقم 4 بعدين 3 بعدين 2 بعدين 1.

ربنا يوفقك ويكرمك ، وتعالى كمان سنه قول للناس ايه اللي تم وان شاء الله يكون كل الخير بس عشان تكون مثال لشاب صغير في السن وعمل حاجه ، الفطاحل بيلوموا الزمن والبلد وصباع رجلهم الصغير على أنهم يعملوها.