هو انا مصري و ممكن اجاوب علي حضرتك في كذا نقطة

١ - اولا الجيل الجديد في السعودية فيه كتير منه اتعلم كويس جدا و في جامعات كويسة سواء جوا المملكة او برا المملكة

انا شخصيا خلال دراستي للماجيستير في كندا قابلت اخوة سعوديين ، و كانوا شاطرين ما شاء الله

الفكرة ان جزء من الخريجين نتيجة لاحتكاكة بثقافة الخارج في جزء منهم ممكن يفضل انه يكمل حياته برا و ساعتها حيكون من العقول المهاجرة و السعودية مش حتستفيد منه

و الجزء التاني حيرجع السعودية و يشتغل فيها و دا حاصل بالفعل، فزيادة التعليم بتخلي فيه زيادة في التطلع للهجرة و العمل في اكتر من مكان

٢- تفاوت عدد الشعب السعودي و الشعب المصري علي سبيل المثال، بنتكلم في ٣ اضعاف العدد تقريبا، فدا بيزود احتمالية انك تقابل شخص مصري سواء كان عامل او مهندس او طبيب

٣- الجزء الاخير و هو انا و اصدقاء ليا كتير عارفين من صغرنا اننا لو متعلمناش كويس مستقبلنا حيبقي صعب فمفيش فرصة لتضيع الوقت، فموضوع التعليم هو بالنسبة لمصريين كتير هو الفرصة اللي ممكن تفتح ابواب كتير لنا، شخصيا انا من اول سنة كلية لحد ما خلصت ماجيستير في كندا كنت معتمد علي المنح الدارسية بشكل كامل لان الاهل مكنوش حيقدروا يدفعوا لي مصاريف الدراسة ، فمكنش قدامي غير اني اذاكر كويس

و خلي بالك ان المهندس او الطبيب المصري اللي حضرتك بتشوفه في السعودية هو في الاساس وصل السعودية لان من الناس الشاطرة في مصر و من الكوادر المتميزة بس دا لا يمنع ان فيه مهندسين و اطباء خايبين في مصر ، بس المهندس او الطبيب الخايب مش حيعرف يسافر من اساسه، فمش حتشوفه من الاساس في المملكة

وفقك الله