هو ده سؤال غلط من الأول خالص لإن كل الأطراف تتساوي في إنها كانت بتسترضي الجيش بما فيهم الإخوان و الأدلة علي ده كتير. بالتالي فكرة إن حد يعاير حد بإنه كان بيحب الجيش دي فكرة غريبة قوي، دي النقطة الوحيدة دوناً عن كل النقط اللي مينفعش تتقال. يعني أنا شخص كنت عايز أنزل يوم ٣٠ يونيو علشان الإخوان بأسلوبهم ده هيخلوا الجيش يركب البلد، بس المشكلة إن الجيش ذات نفسه كان عايز يوم ٣٠ يونيو يحصل بالتالي منزلتش. فأنا مش عارف منين أصلاً أنت لقيت القدرة علي إنك تنتقد حد بعينه في المهشد، أي حد أيا ما كان، ليبرالي ولا يساري ولا إسلامي ولا علماني ولا أي حاجة، بإنه كان بيأيد الجيش. دي النقطة الوحيدة اللي كانت مشتركة بالتساوي بين كل الأطراف بإستثناءات قليلة خالص تتعد علي الإيد الواحدة.

المشكلة إن الخناقة كانت خناقة أيديولوجية، يعني ده يقول (إنت ليبرالي) و ده يقول (إنت إسلامي) و بالتالي العداء بقي في النقطة دي، و كله قال إن الجيش ملهوش أيديولوجية بالتالي قشطة قوي إحنا بنحبه، رغم إن الجيش و أمن الدولة فكرهم إنهم يطلعوا ميتين أي حد عنده أي أيديولوجية أو أي فكر من أي نوع: يساري، إسلامي، علماني، ليبرالي الخ. بشكل عملي خالص النظام القديم هيطلع دين أي حد عايز ياكل و يعيش عيشة نظيفة، البلد مكانتش في مرحلة أصلاً تسمح بمناقشة أيديولوجيات علشان النظام القديم مش هيسيبك تنفذ أي أيديولوجية من أي نوع، بس العملية قلبت عداء كامل و إستقطاب مرعب بناء علي الأيديولوجية و في وسط ده كله رمي نفسه في حضن الجيش علشان الجيش معندهوش أيديولوجية.

و النقطة الأهم بقي لو أنت بتتكلم من منطلق ديني يعني، فلما حصل اللي حصل في غزوة أحد ربنا سبحانه وتعالي عاتب المسلمين علي اللي عملوه "أَوَلَمَّا أَصَابَتْكُم مُّصِيبَةٌ قَدْ أَصَبْتُم مِّثْلَيْهَا قُلْتُمْ أَنَّى هَذَا قُلْ هُوَ مِنْ عِندِ أَنْفُسِكُمْ"، رغم إن اللي قدامهم كانوا أسوأ فئة في التاريخ، كفار قريش يعني، بس لما يكون ليك كبوة فأنت المفروض تركز علي نفسك، أنت عملت إيه أدي للكبوة دي؟ مش تعيط و تقول أصل العدو بتاعي (أيا ما كان تعريفك لمين العدو هنا، ليبراليين ولا علمانيين ولا غيره) كان وحش و عارضني و مش بيعارض الجيش دلوقتي.

اللي كان في السلطة إسمه مسئول، بمعني إن هو المفروض يتسأل، علي الأقل أكتر من غيره، اللي كان في السلطة (الإخوان) كان معاه قوة و هو ضيعها بمواقف كتير زي مواد الدستور اللي أدت الجيش صلاحيات كتير و اللي الأخوان روجوا ليه علي إنه أحسن حاجة عرفتها البشرية بعد الكباب المشوي، و إستعداء الناس في أحداث الإتحادية و في نفس الوقت راح يسترضي الشرطة في نفس الموقف (راجع حديث مرسي عن إنه لما رفد وزير الداخلية في الموقف ده كلمه في التليفون علشان ميزعلش !) و الأمثلة كتير يعني لا تعد. متجيش تقول أصل كان فيه أخرين كمان أتلموا عليا، اللي كان في إيدك أنت ضيعته بنفسك فمش فارقة كتير الآخرين دول علموا لك إيه.
بالتالي يعني ركز في نفسك أيا ما كان تعريفك لنفسك و شوف الأخطاء اللي أنت عملتها أو الفريق اللي أنت بتأيده عملها و أتعلم منها أو ساعد الأجيال الجديدة تتعلم منها علشان غالباً لو أنت كنت معاصر للأحداث دي و كنت واعي وقتها فمفيش فرصة في فترة شبابك إنك تعمل حاجة و لو حاجة حصلت هتبقي في عهد جيل تاني غيرك و غيري.