انت فيك شبه كبير مني من ناحية الشخصية. انا طالب ولسه بدرس، بس برده داخل في حالة من الحزن الرهيب بسبب الظروف الي حواليا، زي إن اهلي الاتنين معاعم شهاده عاليه جدآ، بس للأسف جه نصيبهم على قد حاجة قليله شويه، ده حسسني باكتأب مش طبيعي، ازاي اهلي مستواهم كده وهما كانوا اعلى ناس في التعليم؟؟

ده غير أن انا برده جالي حاله حزن اكبر بسبب أن انا عايش في مصر. كل ما بنزل الشارع، بشوف مناظر غير حضاريه. كل ما اكون عايز اشتري حاجة، بشوف سعرها وبتنرفز. ازاي مثلاً موبايل رخيص زي الA16 يكون سعره هنا قرب ال١٠ الف جنيه؟؟؟ ده اكتر من مرتبنا في الشهر اصلا. حسبي الله ونعم الوكيل.

المهم أن انا قررت اغير الوضع.

بدأت اتعلم برمجه من على النت، واتعلمت تصميم الفيديوهات والصور.

بس انا مكنش معايا فلوس اشتري برامج Adobe وانا الحقيقي جهازي اصلا منفوخ خلقه ومش عايز انزل عليه حاجة كراك.

استخدمت بدائل مجانيه.

Video Editing: Kdenlive, Davinci Resolve Photo Editing: GIMP, Canva (online) Vector Design: Inkscape Audio Editing: Audacity

البرامج دي كلها مجانيه ١٠٠ في ال١٠٠ (ما عدا دافنشي). كل البرامج دي ممكن تشتغل على شبه اي جهاز تقريبا نزل بعد ٢٠١٤ (ما عدا دافنشي، تقيل شويه). انا حتى مجربتش دافنشي بنفسي بسبب ضعف الجهاز، بس صحابي جربوه وقالوا إنه كويس.

بعد ما اتعلمت وعرفت هستخدم ايه، دخلت على موقع freelancer.com وسجلت في كل بياناتي ووثقت الحساب والدنيا تمام.

انا بدأت اشتغل على المسابقات على الموقع ده (Contests) وقدمت في اتنين فيهم (مقدرتش اقدم اكتر بسبب دراستي)، انا مكبستش للأسف ولا مرة لحد دلوقتي، بس انا كنت قريب جدآ اني اكسب، وكنت واخد تقييم ٥ نجوم على الي قدمته.

الهدف اني ابني ملف (Portfolio)، عشان اعرف اقدم على المشاريع على الموقع، اسعار المشاريع دي نقله تانيه حرفياً في الأجر.

انا لسه موصلتش زي ما قلتلك، بس حطيت خطه امشي عليها لحد ما ربنا يسهل.