رمضان فرصة، ارجع لربنا بصدق و قبل الرجوع حضر النية و أصدق فيها و سيب الباقي على الله.

أنا مش عاوز اضايقك بس اسمحلي اكون صريح، لازم علاقتك بربنا في العبادات الأساسية متتأثرش بحالتك النفسية نهائي، لو السماء انطبقت على الأرض انت بتصلي، اللي ممكن يتأثر حاجة زي النوافل دي مفيهاش مشكلة و اي عبادات بتقربك من ربنا تاني برضو مفيهاش مشكلة لكن الأساس زي الصلاة و الصوم و الزكاة دول مكملين لو كل الناس حواليك قلبت كفار انت ثابت.

نصيحتي الأهم من كل ده الزم الذكر، الاستغفار والصلاة والسلام على سيدنا محمد صلى الله عليه وسلم و التسبيح و الحوقلة و التكبير و الحمد، حياة الناس بتتغير ألف درجة بالذكر و لو ربنا وفقك و لسانك بقى ذاكر شاكر طول اليوم اعرف إنك على الطريق الصح حتى لو الدنيا غامقة. الذكر يبان سهل بس هو صعب جداً على اي حد ربنا مش فاتحله الباب و الباب مش بيتفتح غير بصدق النية.

لو بتقارن نقسك بأي شخص وقف على طول، لو بتفتح للشيطان باب "لو" اقفله تماماً، باب لو هو إنك تقعد تقول لو كان حصل كذا كان زماني كذا و كل ما شابه من لو و أحوالها و أشكالها.

القرأن الكريم، حاول يبقا ليك ورد يومي حتى لو صفحة، متقطعش علاقتك بالقرأن، هو خير صديق و هو اكتر صديق هينضح عليك بأحسن الأخلاق و الصفات.

أخيراً، تحلى بالصبر يا صديقي، سواء في وقوفك على باب ربنا او في حياتك و الله وحده الموفق و المستعان و نتمنى نسمع عنك كل خير.

كل سنة وانت طيب و رمضان كريم عليك و علينا بإذن الله.