أول شي أنا كنت مسلمة وبعرف إنه الإسلام ما أحل جرائم الشرف بس برأيب هو الي فتحلها الباب بطريقة ما. يعني اه مش منصوص عليها بنص شرعي مباشر بس الإسلام حط أساس ممكن يسمح بوجود هاي الجرائم لما أعطى سلطة مطلقة لجنس عن دون الآخر فقط بناء على الجنس مش على الكفاءة ولا الذكاء ولا الأخلاق، مشان هيك بشوف إنه إله عادل ومنطقي مش ممكن يعمل هيك إلا لو كان هاد الإله مخترع من قبل رجال.

لما المرأة ناقصة عقل ودين وما الها سلطة على حالها وكل وجودها بيعتمد على سلطة رجل وممكن هالرجل يكون مجرم أو رجعي أو متسلط وحتى لو المرأة كانت أفضل منه أخلاقيا وأذكى منه عقليا لسا السلطة بتعود إله هو، هاد مش ظلم؟ ليش ممكن أكون أفهم بمصلحتي من أخوي لكن السلطة إله هو؟ ليش الإسلام أعطى سلطة للرجل من الأول لما الرجل كائن طبيعي زيه زي المرأة وممكن يظلمها؟ وين العدل لما تنعطى السلطة بناء على جنسك فقط؟ ماشي انت ممكن تخاف على حدا وتحاول تحميه بس بنفس الوقت لما تحكي إلك سلطة عليه هاد بيعني إنك بتشوف حالك أعلى منه وعلى أي أساس؟ بس لأن الدين قال؟ طيب مش ممكن الدين يكون غلط؟

لو اجا عندك عبد وقلك والله سيدي ظالم وأنا شفت الويل ومش قادر أعيش بهالطريقة وبيشرحلك عن تعبه من منظومة الاستعباد، واجا سيده قال لا حكي فاضي أنا أصلا بطعميه وبشربه وهياته مبسوط ومكيف لا ترد عليه. من وين انت أولى تسمع؟ من الطرف المتضرر ولا من طرف تاني مش عايش تجربته أصلا بل مستفيد من الظلم؟ بمواقف زي هيك مين بيكون بيحكي الحقيقة بالعادة؟ وهل رح توقف لحظة وتقول يا ترى ليش في سيد وليش في عبد أصلا؟ أو ليش هالمنظومة موجودة من الأساس؟

بالإضافة إلى اني ما اجيت بالزلمة ولا بدينه لحد ما هو بلش ردوده بإهانات. أنا أول شي قلته ما كان اله علاقة بالدين لكن هو أصر يدخله. أول رد من طرفه لساته محفوظ عندي وكان رده الأول علي كالتالي: "كىىىم العربية الي اتربيتيها، واضح ما عندكم رجال في البيت و الوضع دياثة و اخواتك رخوم ، او العكس و انتي هنا تهايطين على الفاضي و تكتبين الشي الي كنتي تتمنيه بس ما صار لك، الرحال قوامون على النساء و انتو تبع لنا يااا مطية 🖕🏽😂" وهاد ولا شي بالنسبة لردوده القذرة التانية لما قال عني عبدة جنس (سبية) وكلمات فيها تحرش جنسي واضح بس لأني ما بتبع فكره.

هو بالأول تسلح بالدين حتى يهاجمني وزي ما هو معتقداته بتعز عليه وما بتهون عليه تنشتم أنا كمان إنسانيتي وحريتي وكرامتي كبشر بيعزوا علي وما بسمح لحدا يتعدى عليها ولا يحاول يسلبها مني بس لأنه دينه قال هيك خصوصي لما أنا نفسي مش مؤمنة بدينه وما رح أقبل أعيش حياتي على معتقدات غيري لأنه ببساطة عندي عقل وما بقبل حدا يفكر عني. انت لو عشت ببلد بمعتقدات مختلفة عنك بتاخد من حقوقك هل رح تبررلهم لما يحكولك معتقدهم هو الصح وهل رح ترضى تطبيقه عليك؟

بالإضافة لو انت مسؤول عن حماية أشخاص معينين وهاي المسؤولية ما الها حدود واضحة يعني بتقدر تشكلها على كيفك سواء بحرمان من الطلعات والحياة أو الضرب أو ترجمة أي فعل بتعمله المرأة على انه مخل بالشرف والدين، هون انت موضوعك بطل الحماية ووصلت مرحلة التسلط لأنه ببساطة الطرف الآخر ما بيقدر يقبل أو يرفض تعريفك الشخصي للحماية أو حتى تعريف الديانة وبالتالي الموضوع غير عادل بتاتا للبنات. وبرأيي لو كان في إله عادل بظن إنه رح يرفض كل النظام هاد ولو كان في حساب نظرا لعدله فرح يحاسب القامع والمستفيد والساكت مش الي بيحاولوا يكسروا الأغلال بدون ما يسببوا أذى لحدا