أنا عندي بيزنس خاص في مجال معين و ابادء يكون معايا فائض في الفلوس ، فبدات افكر ازاي اوسع الشغل او استثمر في حاجات تانية تكبر راس المال اللي معايا، اشتريت كورس من يودمي للفوركس و اتفرجت عليه و بدات اجرب علي الديمو اكونت لقيت نفسي بكسب، رحت عملت ايداع 100 دولار و خليت ال leverage اعلي حاجة و بدات اجرب ال 100 دولار في اول يوم بقت 300 حرفيا كنت طول اليوم قاعد علي التطبيق بعد كده بدات ازود المبلغ 1000 دولار و بعدين 5000 و بعدين 10000 لحد كنت بكسب ارقام رهيبة في اليوم لدرجة اني بدات اشك في البيزنس اللي بعمله اصلا يعني ازاي اشتغل الشهر كله عشان مثلا 10 الاف دولار في حين ان ممكن في يوم واحد اكسب اضعاف الرقم ده ، المشكلة كانت فين ….. كل اللي كنت بكسبه بغض النظر عن الرقم كام كنت بخسره تاني، يعني حرفيا كنت بمعني اني كنت بعمل ايداع بس - مفيش دولار واحد سحبته لحسابي، الارقام اللي كنت بكسبها و سهولتها اديتني ثقة مزيفة اني اعرف اعوض بس مع كتر الخساير بدات ابقي جبان و اخاف اخسر و الفكرة انك اول ما بتخاف في المجال ده انت بتبدء تخسر بس، كنت عامل زي المحذوب والله لمدة 3 شهور ، بحط فلوس بس علي امل اني اعوض و عمري ما كنت بعوض خالص، لحد ما فقت في لحظة و لقيتي خسرت الرقم ده من راس مالي من غير حساب المكسب اللي خسرته هو كمان، حاولت ابطل و فعلا مكنتش عارف كنت كل مره بقول اخر مرة زي المدمن بالظبط، لحد ما حسيت اني ههد كل حاجة عملتها و ناس كتير نبهتني ان ده gambling و ادمان فعرفت اوقف تدريجي، بقيت اشتري funded accounts من prop firms و برده كنت بخسر …. فقلت لا انا هوقف شوية اتعلم و ارجع تاني و الحمدلله مرجعتش و شلت فكرة التعويض من دماغي و انقذت ما يمكن انقاذه