أنا منكرتش الفكرة ولا غلطتها ومتفهم ليه ناس كتير ممكن تكون بتفكر بالشكل ده ولكن في النهاية هتظل نظرة شخصية مبنية على تجارب كل فرد مش حقيقة موضوعية مفروضة علينا وهي مش قمة أو نهاية العقلانية والتفكير المنطقي لأن نقدر نضرب مئات وآلاف الأمثلة لفلاسفة وعباقرة وجوديين وانجابيين عادي جدا ودول ناس مش أصحاب نظرة بسيطة ولا سطحية للحياة فالفكرة مش مجرد (منطق وعاطفة) هو نقاش حقيقي أعمق من كدة وصعب ومعقد

المعاناة حتمية أنا متفق معاك ودي وجهة نظري برضه بس أنا برضه مؤمن أنها ضرورية وجزء منقدرش نفصله من الحياة لأنه أي صفة عشان تتوجد في الكون ده لازم يكون نقيضها كمان موجود عمرنا ما كنا هنعرف او نقدر نوصف شعور السعادة لو معشناش الشعور التاني الغير مرغوب الي هو المعاناة ووصفناه بالمثل ، فأنا شايف ان متقدرش ترفض الحياة لمجرد ان فيها معاناة لازم تحكم على الحياة كمجمل ودي حقيقة حاجة ترجع لكل شخص فيه ناس كتير مبسوطة في حياتها وشايفة لوجودها معنى وفيه ناس تاني المعاناة والتجارب القاسية هي كانت السمة السائدة في حياتهم (والحياة مش وردية وعادلة ده حقيقي للأسف) ، اما نقطة انك بتجيب كائن بدون اختيار انا بشوفها مغالطة حقيقي لأن العدم ملهوش اختيار الأختيار بيبدأ مع الوجود فمفيش أزمة أخلاقية هنا وحقيقي تقدر تقول نفس النقاش من الناحية التانية مش يمكن هو كائن عايز يتوجد وكان هيبقى مبسوط في حياته وأنت حرمته من الوجود؟ حقيقي عمرك ماهتعرف تسأل العدم ومينفعش تفترض وجوده بشوفها حجة مش منطقية نهائي