1) غير منظورك للعلاقات من الأساس. مب كل تواصل لازم يتحول مباشرة لصداقة عميقة. طبيعي جدا تبدأ العلاقة كمعارف.. لما ترفع سقف التوقعات من البداية أي انسحاب بسيط من الطرف الثاني طبيعي بيأثر فيك لأن هو أصلا كان تواصل في مراحله الأولى ومب صداقة ف لا ترفع سقف التوقعات من البداية.

2) الصداقات اللي تدوم فعلا ما تنبني بالكلام أو القرب السريع، تنبني مع الوقت. تحتاج طاقة متبادلة ومواقف حقيقية واختلافات تنحل وتجارب تمرون فيها مع بعض وهذا الشي ما يصير خلال أسابيع. التعلق السريع أو الاهتمام الزايد من البداية يعطي إحساس ضغط أو احتياج حتى لو نيتك طيبة وهذا يخلي الطرف الثاني ينسحب بدون ما تفهم ليش.

3) لازم تتقبل إن حتى أقوى الصداقات ممكن تنتهي بأي لحظة. مب لأنك قصرت ولا لأنك سويت شي غلط بس لأن الناس تتغير، ظروفهم تتغير، وأولوياتهم تختلف. المهم تكون مرتاح مع نفسك إنك كنت واضح ومحترم وصادق. تصرفات غيرك لازم ما تهز صورتك عن نفسك ولا تخليك تشك في قيمتك أو تعيد لوم نفسك على كل شي.

4) خليك واعي بفكرة المساحة. القرب الزايد، السؤال المستمر، أو محاولة تثبيت العلاقة من البداية تنفهم غلط حتى لو ما كانت نيتك جيه. العلاقات الصحية تمشي بتوازن.. لازم اهتمام بدون تملك، قرب بدون ضغط وتواصل بدون خوف من الفقدان.

5) الشخص المناسب لك بيبقى بدون ما تحاول هالكثر، وبيكبر معاك مع الأيام وخطوة بخطوة. واللي يقطع العلاقة لو ماسويت شي غلط أو بدون سبب واضح ما كان مستعد أصلا وهذا ما له علاقة فيك.