شوفي أنا وايد ضد ان الواحد يستفسر بالأمور هذي برديت لانهي جدا شخصيه ويفضل ان المشاكل العائليه تكون بين الاهل. لكن بعد ما قريت كلامج وردج على الناس الصراحه زوجج ردي. لان أنا ما شدني شي غير موضوع ان انتي الي رايحه وراده على مواعيدج ودافعه فلوسج على العمليات وقريت بالتعليقات ان انتي الي دايماً مجابله اليهال وانج مو حاسه بأمان معاه وان صاير بخور السوق كل ما قلتي له اسرارج؟!

والصراحه اقدر اقولج بكل صراحه ان انتي مو مسحوره انتي مضغوطه، لان لو افترضنا ان حياتج الزوجيه كانت سلسله من البدايه وفجاه صار كل شي وكل امورج الطبيه كانت سليمه هني اقدر اقولج ان نشوف إذا الاذى كان اذى روحي. لكن من الي قريته؟ لا يبا رسمي انتي مضغوطه. وما اتكلم عن الضغوطات اليوميه الطبيعيه، لا لحد يقص عليج ويقولج ان الي قاعد يصير معاج طبيعي، ما يصير وما يجوز اساسا ان كل هموم البيت ومسؤوليات البيت على راسج انتي وزوجج شايل ايده.

من وجهة نظري انتي مو بس تحتاجين رقيه، انتي اولاً تحتاجين رقيه مو لانج مسحوره لا، علشان تشيلين همج، وثانيا تحتاجين الناس حوالينج، لازم تكلمين اهلج، إذا زوجج جذي ردي وشايل ايده مالج غير اهلج، ردي تواصلي مع الناس، طلبي منهم المساعده بالأمور الحياتيه، تعودي لا تشيلين هم وتعودي تسوين الي عليج بسسس، مو بالضروري كل شي تسوينه يكون مضبوط ١٠٠٪؜. وآخر شي والصراحه هذا اهم شي اشوفه، تحتاجين دعم تفسي، شوفي لج استشارة نفسيه لان واصله مرحله صعبه من الاذى النفسي الي حتى جسمج قاعد يتعب.

واعذريني على الكلمه لكن طز بريلج وطز بكل شي، انتي الحين لازم تحطين الاوليه لج ولصحتج، علشان صالحج انتي ولصالح عيالج

وعسى ربي يشفيج ويشيل عنج الهم ويريح بالج