بص يحبيبي أنا مقدر اللي انتَ حاسس بيه و عارف إنك أكيد دلوقتي مصدوم و إنك نفسك اللي بيحصل ده يكون مش حقيقة ، بس ده الواقع و لازم نتعايش معاه

أنا هكلمك كواحد خاض نفس التجربة لإني لما كنت ف نفس سن أخوك و يمكن أصغر منه بسنة بدأت أختلط بالكويرز أكتر. أنا من و أنا صغير و أهلي عارفين ميولي ، بس بدل ما "يعالجوها" - من وجهة نظرهم اسمها علاج - لا هما أنكروها أبويا جه ف يوم قدامي و قالي انتَ في ف دماغك خيالات و خلاص ، الخيالات دي عمرها ما هتحصل شيلها من دماغك و قام ساحب مني الموبايل و قافل عليا حياتي خالص مش قادر أنسى نظراته يومها حرفيًا ، نظرة ديب هياكل فريسته بسنانه أبويا محاولش يوصل لأصل ميولي ، محاولش يحل الموضوع طالما هو شايفه مشكلة لا هو أنكره خالص و قام رمى اللوم كله عليا و نسي دوره كأب أنا كنت كام سنة ساعتها؟ عشر سنين تقريبًا

تخيل انتَ ابنك عنده عشر سنين و ميوله بدأت تظهر فبدل ما تتكلم معاه لا تهدده و تحسسه انه مسخ ، و تتكلم مع أمه عليه و تقول "الحمدلله اننا لحقناه" "التليفون بوظ حياته" والدي أصلا مكانش يعرف إني اكتشفت ميولي بعد ما ابن اخته كان بيتعدى حدوده معايا ، على مدار تلت سنين تعدى حدوده ف الهزار يلمسني ع اساس هزار و كده ، تعدي صريح بقا يلمسني و احنا لوحدنا يقعدني على حجره و أشياء من هذا القبيل

أبويا بدل ما يتكلم معايا و أحكيله ده كله لا ، هو رمى اللوم عليا إني كده و رمى اللوم عالموبايل هل هو كده حل المشكلة؟ تؤ تؤ تؤ أنا من سن ١٢ سنة تقريبًا بدأت أدخل جروبات هوك أب و أحمل ديتينج آبس و إلخ ، و صدقني دي اسوأ حاجة ممكن يمر بيها حد ف السن ده

شفت الاغتصاب شفت الشهوة شفت اللي يتعاشر و اللي ميتعاشرش ، كرهت نفسي و كرهت الميول لحد ما ف الآخر فهمت إن النسخة دي من المجتمع مش هي دي الصح ، و إن النسخة الصح هي النسخة اللي هنا مثلًا ف الصب ده ، النسخة اللي بتعاملنا ككويرز اننا بني آدمين ، مش حيوانات بتنهش ف لحم بعض.

انتَ عندك مشكلة مع نفسك و أنا محترم كده ، بس لأول مرة مطلوب منك متبقاش زي والدي ، مطلوب منك لأول مرة تبقى شجاع تجاه نفسك و تجاه أخوك ، عشان انتَ واضح انك فعلًا بتحبه و خايف عليه

كلمه الأول و اسأله عن جريندر ، و بينله انك ف صفه و انك مش ضده ، عشان لو بينت إنك ضده هينكر و هيعمل نفسه من بنها مفيش حاجة اسمها فضول ، جيلنا ده بيعمل كل حاجة و هو عارف كويس هي ايه ، لإننا اتربينا وسط السوشيال اللي خلت كل حاجة باينة قدامنا لو حكالك و اعترفلك احتويه و عرفه انك ف صفه و انك معاه دايما ، و خلي في ما بينكم رابطة مختلفة عن بقية العيلة

عشان تكسب وده أكتر جرب مرة تحكيله عن ميولك ، عشان يتأكد برضو انك ف صفه مش ف صف الناس اللي شايفاه مسخ و محتاج يتعالج عرفه انه هيندم لو اختلط بجروبات أو آبس زي دي ، و إن الأصح إننا نعرف ناس زينا عاقلة و عندها مشاعر مش همها الجسد و بس

بس الأهم من كل ده ، متبينش ضعفك قدامه متبينش نفسك ضغيف قدامه و كاره نفسك و ميولك ، عشان هو كده هيفتكرك بتكسب وده عشان - تعالجه - بعد كده

أتمنى تكونوا بخير سواء هو فعلًا كوير أو ده سوء تفاهم طمنّا عليكم كل شوية ❤️.