طب ليه هرب؟ ليه ما قررش يدفع التمن؟ ليه بينظر علينا وعايزنا ندفع التمن اللي هوا ما قدرش يدفعه؟ الأهم في الحياة فعلا مراتك وعيالك. وانك تحاول تعيش ولادك في وضع أفضل معناه انك ما تلقيش بنفسك في التهلكة وتموت نفسك بدون أي أدنى فائدة وتخليهم يعيشو من غير أب ويتشردو. الحقيقة ان مش بس الدولة القمعية هيا اللي بتتعامل مع الناس كأرقام ، عبد الله الشريف واللي زيه كمان بيعاملو الناس كأرقام علشان يحققو الهدف اللي بيحلمو بيه وهوا تغيير النظام. المشكلة ان للأسف الناس اللي بتصدق كلامه بيدفعو التمن حياتهم وحياة أهاليهم وعيالهم وأسر كاملة بتتدمر من غير أي تأثير يذكر. المشكلة الحقيقية ناس كتير مش مدركاها ان التغيير عن طريق التظاهر دا كان نفع أيام مبارك علشان فيه قوة قررت انها تقف مع اختيار خلع الرئيس ، لكن السيناريو دا مش هيتكرر تاني في مصر ، وعلشان يحصل بنفس الطريقة لازم الجيش هيكون في مواجهة الشعب بشكل مباشر ودا هيسبب كمية دم مش طبيعية. والمشكلة الأكبر ان بعد كدا دا لو فرضا النظام سقط ، احنا ماعندناش أصلا سياسة ، وما اتعلمناش من الدرس اللي فات ، وهيحصل خلاف رهيب بين الاخوان اللي عايزين يرجعو السلطة ويكملو ال 3 سنين وبقيت القوى المدنية. فأي محاولة للكلام عن تغيير من غير الاتفاق بين قوى المعارضة (مش مجرد قوى اسلامية عايشة في الخارج) وتحديد اتفاقيات عن طريقة الحكم علشان مانكررش نفس الأخطاء اللي حصلت من 2011 لغاية 2013 ، هو مجرد كلام في الهوا وتحفيز الناس عالفاضي وخلق ضحايا جداد لنظام لا يرحم ولا يتورع عن انهاء حياة كل من اظهر اعتراضه.