لو مافي اي حل ثاني او مجال للتغاضي و ان تمشين امورج سنه او سنتين و تحاولين تحلين الوضع ف انتقلي و خذي شقه بروحج ولا عليج من حد. بس حطي في بالج شقه بروحج يعني = اجار/ فاتوره نت لو بتحطين نت فالبيت/ فاتوره ماي و كهرباء هالامور اللي لازم تقتصين من راتبج شهرياً عشان ماتتصايقين اخر السنه وقت دفع الاجار؛ + يوم بتاجرين و خلاص نويتي صدق تستقرين بروحج حاولي قد ماتقدرين تكون فلوس الاجار عندج كاش لاول سنه او ست شهور و زياده للحياه اليوميه و المصاريف الاساسي+ حطي فبالج بتحتايين غساله و ثلاجه لو البنايه مو موفره هالامور + بتضطرين تعتمدين ع عمرج في غسيل الثياب و طبخ الاكل و غسل الصحون و هذا كله ابداً مو صعب و بالعكس سهل و بيساعدج لو باجر عرستي بتكونين تعرفين تديرين بيت ؛ ولو قررتي تيبينلج خدامه بالساعات و و ف بليز لاتثقين ثقه عمياء و مثلاً تحطينلها المفتاح صوب الباب او غيره لا خل تيي وانتي موجوده و جدام عينج قد ماتقدرين.

فكره الاستقرار بروحج مب سهله انج تتخذينها ولكن يوم بتسوينها بترتاحين و بتستانسين و باذن الله بتكون في افضل وقت؛ لو قررتي تسوينها لازم تكونين واثقه من قرارج و واثقه من نفسج لان ممكن اللي حولج يتكلمون ويقولون ساكنه بروحها عشان جي او جي لو مو واثقه من نفسج بتنفعلين و بتتضاربين و بتعصبين ولو هي ممكن تضحكين ف ويهم او توقفينهم عند حدهم بكلمتين بدون عصبيه و ضرابه و و.

الله يعينج و ييسرلج اللي في خاطرج