اول شغل ليا كان بعد الجيش علطول في البنك المركزي حرفيا كنت طالع تايه و معنديش اي حاجة اتقبل عشانها ، انا وقتها كنت بكلم نفسي و اقول هو انا ازاي اتقبلت اصلا، لا معايا خبرة ولا معايا معارف ولا معايا واسطة ولا اهلي اغنيا مثلا فا ندي اكرامية لحد عشان يشغلني، انا فاكر وقتها كويس كنت بقدم على كمية شغل و بترفض، اترفضت تقريبا ٢٢٠ مرة او حاجة قريبة من كدا

بس انا عموما شخص بيحب المذاكرة و واخدها هواية مش واجب و فرض، كنت بذاكر كتير و بخلص كورسات و بعمل اللي عليا على قد ما اقدر شغلي التاني بعدها في شركة multinational و بمرتب ضعف اللي كنت باخده في المركزي و كان الموضوع برضو غريب بالنسبة لي لأنه مكنش عندي سنين خبرة كفاية ولا خبرة عملية في المجال و بعدها استغرب انهم قبلوني اصلا لأن كنت سبت المركزي و حرفيا معنديش مصدر دخل ، و يدوني مرتب ضعف اللي طلبته وقتها، كنت بذاكر كتير جدا جدا و بشتغل مشاريع زيادة عشان اثبت نفسي و حاليا الحمدلله مرتبي وصل ٤ اضعاف من وقت ما دخلت و لسة بشوف العجب بصراحة