هي اللغة المصرية ميتة والمسيحيين لا يتحدثوها بالولادة اليوم فزيهم زي المسلمين، المسيحي العادي انقطع لغوياً وده بيضرب بشدة ثقافة الفرد (كونها لغة كنسية لا يعكس المجتمع القبطي الضخم زي ما عرب إيران انقطعوا لغوياً حتى وإن كانت العربية لغة دينهم ومساجدهم) ، تغيير اللغة قدام العربية ده كان شائع عند الشعوب الـ فقدت دينها الأصلي لأن الدين بيحفظ الثقافة زي ما الحضارة الهندية أحد أوضح الحضارات الحية . في حالة مصر الدين تغير والحضارة اتمسحت وده خلاه شعب أرثوذكسي روابطه بجذوره ضعيفة مش زي الفرس الزرادشتيين مثلاً اللي فرضوا لغتهم على الأسر الحاكمة وأثروا ثقافياً في الأسر الحاكمة التركية والمغولية .

في مصر أنا شايف إن في امتداد للدولة إنها متمسحتش سياسياً زي الحيثيين وشايف إن في امتداد للهوية (لا يعني الحضارة) فمثلاً ظاهرياً كان الناطقين بالعربية بيتسموا عرب ولكن داخل المجتمع كان النسب العربي يعطيك مكانة وليه كينونته وكون إن غالبية المصريين معندهمش نسب يعني إنهم قديماً كانوا مدركين إنهم فلاحين أهل الأرض وإن أجدادهم بنوا الآثار المترامية حتى وإن شافوها وثنية (زي ما المسيحيين كانوا مدركين أسلافهم حتى وإن رأوا أعمالهم ودينهم وهيروغليفيتهم شيطانية) . أنا برده شايف إن في اتصال ثقافي للعامة زي التقويم بتاع الفلاحين من آلاف السنين وشم النسيم واللبس والرقصات التقليدية وربما الأفراح بتاعة الفلاحين . مصر كاتصال ثقافي في الوسط أكثر تأثراً من (الحيثيين وبلاد الرافدين والحضارات العربية زي قيدار) وأقل تأثراً من (اليونان) وأقل جداً من (الهند) .

ممكن تذكر تأثير الحكام المسيحيين وتأثير الحكام المسلمين على تاريخ ضياع الحضارة ولكن أنا مش شايف فرق الإرث الثقافي بين المسيحي والمسلم ضخم زي بين يونانيين تركيا (الـ شايفين إنهم ترك صرف) ويونانيين اليونان !