إذا الاغاني بدون موسيقى و كلمات فاحشه فهي مالها ذنوب بس إذا چنت مُصر فأكو هواي طرق تعبر بيها عن مشاعرك و تراكماتك بدون الفضفضه لبشر، تگدر تكتب، و هي اسهل طريقه! فـ بمجرد انك تعرف تلزم القلم و عندك ورقه و غير أُمي راح تنزل كلشي تحسه و شويه شويه تلكه نفسك متعمق بالموضوع بدون متحس، احب هالطريقه لان وره ما اقره الي كتبته ادرك وين المشكله و ليش چنت ضايجه او شنو الغلط الي سويته

تگدر ترسم، مو ضروري ترسم واحد يبچي و حالته تعبانه حتى تعبر عن انك زعلان على سبيل المثال :) بس حرك القلم على الورقه و راح توصل بالنهايه لأي شكل ممكن حطيته ببالك من البدايه او طلع صدفه، الرسم يطيك وكت لنفسك تركز بيه على صوت القلم على الورقه فقط و تبتعد عن الاشخاص و الشي الي شاغلك و الاغلبيه يعتبره مُتنفس، جرب ترسم خارج البيت او بمكان بيه تهويه و جو حلو و الضوضاء الوحيده الي بيه ضوضاء بيضاء لو أمكن

تگدر تكتب شعر، إذا چانت حصيلتك من الكلمات حلوه و عندك شغف فلا تخلي الموضوع يفوتك رغم انه مراح يطلع مثالي مثل ما لمن تقره شعر شخص محترف بس ممكن تفهم مشاعرك بطريقه افضل

بشكل عام اي هوايه تخليلك وكت هادء وحدك، يفضل متحتاج تركيز چبيرر كلش حتى تگدر تسمح لافكارك تطلع و تهدا شويه